Lospalos: Kandidatu Trabalhador ba Australia husi Munisipiu Lautém husu Secretario Estado ba Formasaun Profesional no Emprego (SEFOPE), atu loke fatin formasaun ba kandidatu traballador sira iha Munisipiu Lautém, ho nune’e bele fasilita foinsae sira molok aplika ba vaga serbisu Autralia nian.
Preukupasaun ne’e hato’o husi kandidatu Deonildo Boavida Caetano, ne’ebe mak preukupa konaba mekanismu oinsa atu aplika vaga ba serbisu Australia nian husi SEFOPE, tanba tuir nia juventude barak mak seidauk iha konhesimentu kona ba oinsa atu bele aplika vaga serbisu nian iha online.
Relasiona ho ne’e, nia husu atu SEFOPE bele loke uluk fatin formasaun ba Juventude sira iha munisipiu Lautém liu liu liga ho utilizasaun lian Ingles nian hodi bele priense ba formulariu sira molok atu aplika ba vaga serbisu nian iha Australia ne’e.
Kandidatu ne’e informa, dadauk ne’e kandidatu sira aplika ba vaga liu husi sistema online deit, maibe molok ne’e seidauk iha formasaun ruma ba kandidatu sira husi munisipiu Lautém kona ba lalaok sira oinsa atu bele aplika ba vaga ne’e.
“Foin dadauk ba vaga ne’e aplika iha online deit. Maibe ami la tuir formasaun tamba linguan ne’ebe sira presiza mak lingua Inglesh, ne’ebe ita presija aprende duni,” informa aplikante ne’e ba Jornalista Lautém-Post foin lalais ne’e.
Aplikante ne’e haktuir formasaun ne’e importante tebes ba foinsae sira molok governu loke oportunidade ba foinsae sira, tanba tuir nia joven sira presija tuir duni formasaun molok tuir teste.
“Hau hanoin ida ne’e importante tebes tamba kuandu governu loke ona oportunidade hanesan ne’e, hau hanoin sira mos buka meius oinsa para fo formasaun ba joven sira, tamba ita presija tuir formasaun antes tuir teste. Tamba laiha dala ruma ita mai ho matan tomak hau hanoin buat hotu sei lao failla”. Tenik aplikante husi Lautém ne’e.
Relasiona ho preokupasaun ne’e prezidente Autoridade Munisipal(PAM) Lautém Mélio De Jesus informa, nia parte iha ona kordenasaun ho parte SEFOPE katak sei loke fatin formasaun iha Munisipiu Lautém no dadauk ne’e sei diskute hela iha konsellu konsultivu Munisipal nian hodi bele tau ba Planu Asaun Annual(PAA) munisipiu nian.
“Orgulhu tamba SEFOPE tau ona planu katak sei loke kursu formasaun ba iha Munisipiu Lautém, wainhira konstrusaun ba edifisu SEFOPE nian iha Lautém lao, ida ne’e sei lori mai iha konseilhu konsultivu Munisipiu Lautém nian tamba konstrusaun edifisiu ho formasaun kursu presija orsamentu.” Katak Mélio
Prezidente Autoridade ne’e haklaken nia parte sei fahe knar ho parte SEFOPE kona ba oinsa atu harí fatin formasaun iha munisipiu Lautém.
Tuir nia wainhira parte autoridade Munisipal mak tau osan ba konstrusaun fatin formasaun nian liu husi Planu Asaun Annual (PAA) munisipal, konaba formasaun nian nia hateten parte SEFOPE mak sei atende konaba atividade formasuan nian iha Munisipiu Lautém.
“Se autoridade Munisipiu Lautém mak tau ona osan iha Planu Asaun Annual(PAA) munisipiu nian ba konstrusaun fatin formasaun, entaun SEFOPE Munisipiu nian tau osan ba formasuan nian, Mais autoridade mak tau osan ba formasaun entaun SEFOPE mak tau osan konstrusaun office SEFOPE iha Lautém.” Esplika Prezidente Autoridade Munisipiu Lautém ne’e.
Hatan ba preokupasaun ne’e Xefe gabinete SEFOPE Jacinto Robeiro Dias hateten ba programa ne’ebe Governu dasia(IX) implementa iha baze ne’e atu hare liu ba preukupasaun sira ne’ebe mak joven sira hasoru iha baze..
Tuir nia wainhira candidatu balun la liu iha prosesu ne’e, parte SEFOPE sei kontinua nafatin fo formasaun ba juventude sira iha kada Munisipiu.
Ho nune’e joven sira ne’ebe mak la liu iha seleksaun tuir politika SEFOPE nian, sei kontinua tuir nafatin formasaun iha ida idak nia munisipiu rasik.
“Entaun ita prepara fatin, halo prosesu rekrutamentu ba professor sira mos lao ona, hein katak prosesu online ne’e remata, ita termina hira mak bele liu no hirak ne’ebe la liu ita bele halo formasaun iha munisipiu par nune’e kada fulan 4 ita halo teste kontinua lao nafatin,” haktuir xefe gabinete ne’e.
Entretantantu kandidatu hirak ne’ebe mak tuir ona teste hamutuk nain 3.354, hafoin ne’e sei sukat numeru ne’e hira mak bele liu no hirak ne’ebe mak la liu iha prosesu seleksaun tuir politika SEFOPE nian sei kontinua lori formasaun ba joven sira iha ida idak nia munisipiu no la presiza ba iha nasional.
Reprtagen: Veru.
Editor: Joenaca Tupa da conceição
