LOSPALOS: Komunidade iha suku Badoru, Postu Administrativu Lautem, Munisípiu Lautem, uza direitu votu hodi hili Faustino de Almeida ba Xefe Suku iha Baduro.
Iha lei númeru 9/2016, artigu 96 katak STAE nu’údar orgaun ne’ebé atu fó asisténsia téknika atu fó apoiu ba iha eleisaun orgaun suku. Tanba ne’e iha faze preparasaun autoridade munisÍpiu no postu la’o ona ho bazea ba dekretu númeru ° 5/ 2024, atubele organiza fali eleisaun suku iha Baduro.
Faustino de Almeida ba Xefe Suku iha Baduro hodi troka xefe suku antes ne’ebé Ministériu Estatál no Administrasaun nomea ona sai Administrador Postu Lautem.
Diretó r Sekretariadu Tékniku Administrasaun Eleitorál munisípiu Lautém, Sergio Belmonte, relata rezultadu eleisaun suku iha Baduro hatudu Faustino de Almeida eleitu ba xefe suku ho votu 365
“Eleisaun órgaun suku ba Baduro nian iha kandidatu na’in-tolu mak Faustino Dias de Almeida ho votu maioria 365, Inácio Paulo Fernandes 89 no Paulo dos Santos Dias 145”, informa Sergio Belmonte, ohin
Totál eleitor ne’ebé suku Baduro rejistu hamutuk 949, husi númeru ida ne’ebé tuir eleisaun hamutuk 616. Halo kontajen de votu husi aldeia ne’e iha nulu hamutuk ualu, branku 0.
Suku Baduro iha aldeia lima, nune’e mak sentru votasaun mós tau lima mak hanesan Irapala, Tamara, Laclo-Manu, Malae-Lada, Luadau.
Agradese ba konfiasa povu
Entretantu, Xefe suku eleitu Faustino de Almeida, agardese ba konfiansa ne’ebé povu fó ne’e la’ós oportunidade, maibé responsabilidade.
“Husi rezultadu ne’ebé iha, ha’u hanesan sai manán-na’in, ida-ne’e responsabilidade boot ida mai ha’u oinsá sai povu sira-nia matan, tilun iha ha’u-nia mandatu”, nia promete.
Durante mandatu nia sei fó prioridade mak haree uluk ba problema sosiál sira ne’ebé komunidade hasoru hanesan estrada, bee-moos no liña eletridade, tanba suku Baduro iha aldeia lima ne’e, Tamara rasik seidauk asesu ba leletrisidade.
Reportajen: Ekipa Lautem Post
