LORE: Komunidade postu administrativu Lore kontinua preokupa ba kondisaun infrastutura bazika sira, liu-liu kondisaun estrada ligasaun postu Lore ba Postu Lospalos vila ne’ebe dadaun ne’e sai at liu tan hodi prejudika komunidade sira nia movimemtasaun atu asesu ba kapital municipiu Lautém.
Estudante husi EBC Coro Asu de Maloru Joel Monteiro husu ba governu atu bele hadia lalais estrada diresaun postu Lospalos vila ba Lore ne’e, tamba tuir nia durante ne’e prejudika tebes komunidade sira atu halo movimentu wainhira halo viagen ba capital munisipiu iha tempu udan monu rai.
“Ami husu ba Estado atu hadia lalais ami nia Estrada ne’e, tamba ami nia estrada durante ne’e a’at no difikulta ami nia movimentasaun liu liu iha tempu udan”. katak estudante EBC Coro Asu ne’e ba jornalista sira iha Lore.
Nia hatutuan wainhira tempu udan kondisaun Estrada Lore nakfilak ba tahu dodok no difikulta tebes komunidade sira wainhira halo viagen ba capital munisipiu iha tempu udan, tanba ne’e nia husu ba guvernu atu bele tau atensaun ba kondisaun Estrada Lore ne’e.
“Ami nia estrada nakfila ba tahu dodok prejudika ami atu asesu transporte ba kapital Lautém, tamba ne’e ami husu ba estado atu bele halo rehabilitasaun ba ami nia Estrada ne’e.” Tenik foinsae husi postu administrativo Lore ne’e.
Iha sorin seluk komunidade postu Lore Belarmino Dos Santos sente triste, tanba ho kondisaun estrada ne’ebe a’at difikulta tebes komunidade sira atu lori sira nia produtu hodi assesu ba merkadu Munisipal iha tempu bazar. Tamba enfrenta difikuldade oi-oin ne’ebe mak bele estraga sira nia produtu wainhira halo viagen husi Lore ba capital munisipiu Lautém.
“Nudar komunidade sente triste tebes, liu liu estrada ne’ebe liga postu Lospalos to’o mai ami nia rai, tamba ami lao husi ne’e ba Lospalos ami sempre hasoru difikuldade oin-oin”. Katak komunidade Lore ne’e.
Tuir nia estrada nu’udar infrastutura bagika ida ne’ebe importante liu ba komunidade sira iha lokal, liu liu oinsa atu fasilita populasaun sira hodi bele asesu ba transporte públiku no privadu sira, atu bele fa’an sira nia produtu lokal ba merkadu ho nune’e bele sustenta sira nia nesesidade familia nian iha kada uma kain.
Hatan ba preokupasaun ne’e reprezentante administrador postu administrativu Lore Serafino Monteiro Menezes informa rehabilitasaun estrada Ligasaun Lore ba Kapital Munisipiu ne’e tama ba iha kompetensia Guvernu nasional.
Maibe nia promote nudar autoridade postu nia parte sei kontinua hato’o ejijensia ba iha nivel munisipiu atu bele hato’o ba guvernu Nasional liga ho kondisaun estra Lore ne’e.
“Kona ba estrada ne’e tama ba planu dezenvolvimentu nasional depende ba nasional, ida kik sira ne’e mak postu bele rekomenda ba PDIM. nudar reprezentante administrador, ami sei hato’o ba administrador atu tenta nafatin.” Dehan reprezentante administrador postu Lore ne’e.
Nia afirma, maske tempu seidauk to’o atu hadia Estrada ligasaun postu Lore ba capital munisipiu, maibe nu’udar autoridade postu Lore, sei nafatin tenta atu bele hadia lalais estrada ne’e. Atu nune’e komunidade sira bele assesu tamba postu Lore area ne’ebe potensial tebes ba seitor agricultura no turismu.
Entertantu Estrada ligasaun husi postu Lore ba kapital munisipiu Lautém kuaje kilo metru 36 ne’ebe mak hetan assesu husi komunidade hamutuk 5435(Rihun Lima Atus Hat, Tolu Nolu Resin Lima), kompostu husi mane hamutuk 2657(Rihun rua atus ne’en lima nolu resin hitu) no feto hamutuk 2778 (Rihun Rua Atus Hitu, Hitu Nolu Resin Walo) husi suku Lore 1 no Lore 2 iha postu Administrativu Lore.
Reportagen: Veru
Editor: Joenaca Tupa da Conceição.
