LOSPALOS: Ministériu edukasaun fo sai despaxu ida hodi hapara profesores kontratu iha territóriu nasionál. Despaxu ne’e afeta mós ba professores kontratu na’in 7 iha ensinu báziku sentrál númeru 3 Lulira Lospalos, Lautem.
Atualmente, professores kontratu tenke pondera (para provizóriu) nia servisu hodi hein desizaun husi ministériu edukasaun.
Diretór ensinu báziku sentrál no° 3 de Lulira, Lospalos, Armindo Matos, hateten, bainhira ministériu edukasaun hapara profesores kontratadu, impede prosesu aprendizajen.
“Afeta ba prosesu aprendizajen estudante sira nian. Inskrisaun ba alunus foun halo ona maibé professores kontratadus labele hanorin”, dirizente esplika.
Diretór ne’e informa, profesór kontratadu na’in 7 ne’ebé antes ne’e hanorin, la’os governu mak la selu maibé selu ho inan aman nia kontribuisaun.
“Profesór kontratadu na’in 7 ne’ebé hanorin iha ne’e selu ho kontribuisaun husi inan aman” nia esplika.
Profesora kontratado, ensino Bazico central no°3 de Lulira Lospalos, Argelia Madeira, sente triste tanba ministériu hapara ona sira nia kontratu.
“Ha’u sente triste tanba ministériu edukasaun hapara ona ami nia kontratu” Dehan nia ba Lautem post, segunda, (08/01/).
Entretantu, profesór kontratadu iha EBC no°3 De Lulira hamutuk na’in 7, kompostu husi feto 3 no mane 4, profesór permanente hamutuk 14 maibé na’in 4 sofre moras no la ativu servisu.
Relasional ho preokupasaun ne’e jornalista Lautém post tenta konfirma ho diretór edukasaun munisípiu Lautém maibé laiha fatin.
Reportagen : Nandez Veru.
Editor : Black Angel
