LOSPALOS, 08 Agostu 2023 (Lautem Post)- Mate restu Levantamentu armada iha suku Leuro, Postu administrativu Lospalos, munisípiu Lautem, husu ba Governu atu harii monument Levantamentu armada no deside nia loron nasionál hodi selebra kada tinan.
Levantamentu Armada ne’e akontese iha loron 8 Agusto 1983 iha teritóriu laran tomak inklui iha suku Luero, Munisipiu Lautem hanesan asaun organizadu ne’ebé sai nu’udar kontinuasaun hosi funu segundu etapa gerrilla hafoin baze apoiu rahun.
Portavóz Mate Restu ba Levantamentu Armada iha Suku Leuro, munisípiu Lautem, Teofilo Sebastião Sarmento hateten levantamentu armada iha loron 8 agosto 1983 ne’e, loron ida ne’ebé populasaun territóriu Timór simu orden luta atu hala’o asaun foti kilat husi inimigu hodi halai ba ai-laran atu apoia ba FALINTIL.
“Ho razaun ne’e, ami vitima mate restu hato’o ami nia ejizensia ba governu hodi rekoñese loron levantamentu armada hanesan mós loron nasional sira seluk ne’ebé vigora iha K-RDTL. Husu ba Parlamentu Nasionál atubele levanta asuntu loron istóriku ida hodi bele hetan rekonesimemtu husi estado. Husu atu kria lei hodi regula no organiza fasilita no finansia atividade sira,” Hateten nia liuhosi Konferensia Imprensa.
Nia mós husu atu harri mós monument, nune’e kada tinan sira bele ba kari ai-funan hodi fó onra ba loron istróriku ne’e.
“Aktividade kari aifunan ne seidauk organizado tanba ita nia monumemtu seidauk iha, ida ne’e mós kontribuisaun husi inan aman sira hodi halo netik hanesan ne’e. Ami husu atu finansia, la’ós iha Leuro de’it maibé iha suku Mehara, Serelau inklui Kraras Munisípiu Viqueque”, nia afirma.
Iha biban hanesan, Xefe suku Leuro, Carlito Viegas agradese ba komunidade suku Leuro ne’ebé sempre hatudu vontade di’ak hodi selebra loron levantamentu refere.
“Agradese tebes ba partispasaun no kontribuisaun komunidade husi suku Leuro ne’ebé sempre hatudu vontade di’ak ba komemorasaun levantamentu armada iha tinan 1983. No iha parte ida sente triste tanba durante ukun aan too agora estadu ka governu seidauk rekoñese”, nia agradese.
Entretantu, Komandante PNTL munisípiu Lautem, Superintendente António Rego Fernandes mós apela ba komunidade suku Leuro atu lalika lakon esperansa hodi komemora nafatin loron istóriku ne’e.
” Ami nia parabéns nu’udar loron ne’ebé mak importante espesialmente ba suku Leuro ne’ebé kada tinan ita hotu hamutuk hodi komemora,” katak nia.
Komemorasaun loron levantamentu armada ne’e hetan kontribuisaun husi autoridade suku Leuro, Veteranu sira, komunidade husi suku refere kompostu husi aldeia haat hanesan aldeia Leuro, Carano, Luturula, Sorumoko no komunidade suku Leuro ne’ebé hela iha Dili. Ho montante osan hamutuk $820.00.
Reportagen : Demigildo Veru Fernandes
Editór : Helefatil
