LOSPALOS- Sarani Katólika iha Timor-Leste no mundu tanis halerik tanba lakon nia bibi-atan di’ak Sua Santidade Amu Papa Francisco ne’ebé hakotu ona nia perigrinasaun iha mundu raik-laran no bá ona Na’in nia kadunan santu.
Papa Francisco hakotu iis iha segunda, (21 Abríl 2025) ho idade 88, iha dader, tuku 7:35, oras Vatikanu-nian. No iha tuku 13:35 oras Timor-nian.
Ho nune’e, Vise Primeiru-Ministru, Ministru Koordenadór asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, reprezenta Governu Timor-Leste anúnsiu lutu nasionál ba Papa Francisco nia mate durante semana ida.
Lutu nasionál ne’e sei diskute iha Konsellu Ministru ba loron-aban. “Aban sei iha konsellu ministru, sei dekreta lutu nasionál atu Katólika sira, padre, madre halo orasaun durante semana ida-ne’e nia laran ba Amu Papa Francisco no ita sei dada bandeira durante loron hitu nia-laran”, Governante ne’e informa.
Nune’e, nia husu atu hothotu halo orasaun, hanoin hikas Papa nia hahalok no liafuan sira.
“Governu loke oportunidade ba fatin altar santu Tasi-Tolu Dili hodi sarani sira bele halo orasaun no realiza misa ba Amu Papa nian iha ne’ebá”, nia énfaze.
Nia hatutan tan: “Ohin laiha ona ita-nia leet, vizita mai Timor-Leste ne’ebé inspira, hafanun no fó mensajen furak katak, tenke kuidadu oan sira, kuidadu joven sira, kuidadu povu ne’ebé mak furak para kontinua dezenvolve futuru Timor-Leste mak ita tenke investe ba labarik no joven sira”.
Lori governu nia-naran hato’o sentidu kondolénsia klean. “Ita hotu-hotu hamutuk ho Governu da-sia hato’o kondolénsia klean ba Igreja Katólika no família boot Katólika iha mundu tomak no ba ema hotu-hotu ne’ebé simu nia liafuan hodi fó onra no glória ba nia”.
Ministru ne’e dehan, Papa Francisco hanesan figura ne’ebé dignifika ema no sempre ko’alia konaba justisa sosiál laiha ona. “Liafuan, ninia hahalok inspira teb-tebes ba pás, estabilidade iha mundu hodi hamosu fraternidade umana”.
Ekipa: Lautem Post
