Lospalos: Autoridade Protesaun Civil (Sigla Portugés APC) ho Corpo Bombeirus, munisipiu Lautém, labele halo atuasaun emergensia iha fatin dook husi vila, tamba kondisaun Estrada a’at no transporte ne’ebé uza seidauk halo manutensaun.
Komandante APC Lautém, José Paicheco informa relasiona ho elementus balun husi viatura Corpu Bombeiru no APC aat, difikulta serbisu Corpu Bombeirus Munisipiu Lautém atu halo atuasaun emergensia iha fatin ne’ebe dok husi vila tanba kondisaun Estrada aat.
“Transporte ninia elementus balun mak ladun diak ona. Exemplu kareta autokomandu Bombeirus nian ne’e, ninia rolamentus mak rahun ita sei bele uza iha besik sira ne’e iha vila laran deit para halo serbisu, maibe atu ba halo atuasaun iha dok ruma ne’e araska tanba orsida roda bele monu sai fali tanba dalan la diak” katak Komandante APC Lautém.
Alen de ne’e kona ba viatura APC nian rasik, nia hateten presiza ona halo manutensaun tanba dadaun ne’e kondisaun roda mihis ona no difikultu rebisu APC nian atu halo verifikasaun no lenatamentu dadus dezastre nian, inklui atu fasilita apoiu emrgensia nian iha postu sira ne’ebe mak ho distansia dook husi vila.
“Mai iha APC nian rasik, viatura sira ne’ebe mak iha ne’e kareta foun hela maibe nia roda maka durante ne’e seidauk troka. Nia roda mihis hotu, ne’e presiza para halo manutensaun hodi troka nia roda para depois serbisu ruma hanesan foti dadus ruma no verifikasaun ba iha postu sira Ezemplo: Ilomar, Luro, ho seluk tan ne’e bele ba,” tenik nia.
Nia hatutan tan, “tanba roda botak hanesan ne’e ita ba dalaruma la to’o tanba do’ok liu, estrada mos la diak dala ruma roda bele nakfera hotu iha dala. Ida ne’e mak difikulta serbisu operasional APC nian.” komandante ne’e esplika.
Kona ba kondisaun viatura komandante ne’e haktuir, nia parte halo ona pedidu manutensaun ba nasional no hetan ona resposta atu halo manutensaun iha tempu besik.
“Ninia data fixu mak hau seidauk bele fo sai maibe hahu husi director sesante mos halo ona relatoriu ba iha nasional, hau mos konfirma no iha ona komfirmasaun katak iha ona tenderizasaun atu bele lori kareta sira ne’e hodi bele halo manutensaun, iha possibilidade offisina mak tun mai hadia kareta sira ne’e iha ne’e ou se lae ami mak lori kareta sira ne’e ba hadia iha ne’eba.” Nia Informa.
Sorin seluk, komandante Corpo Bombeirus Lautem, Martinho de Carvalho, preokupa viatura ho marka Auto Komandu, nia rolamnetus parte oin mak rahun, labele dezloka ba fatin do’ok.
“Ba fatin dook susar. Tanba rolamentu rahun durante fulan ida mas la halo manutensaun”, komandante preokupa.
Entretantu dadaun ne’e total Viatura hamutuk 4 no motorizada 2. Ne’ebe fasilita servisu APC no Corpo Bomebeiro munisípiu Lautém.
Reportajen: Veru.
Editor : A.B
