Lospalos: Parlamentu Foinsa’e Timor-leste, nudár organizasaun ne’ebé governu harii hodi akumula foinsa’e timoroan hodi aprende lalaok demokrasia no implementasaun direitu no devér sidadaun.
Alumni Parlamentu Foinsa’e Timor Leste (APFTL) Sosializa programa ba joven sira atu aplika vaga ba parlamentu foinsa’e ba periodu V (dalima, 2024- 2026).
Xefe Departamentu, Ministériu Juventude Arte Kultura, Agustinha Dias Cabral, hateten, programa parlamentu foinsa’e periodu 2024-2026, fó oportunidade ba joven sira, tanba ne’e, sosializa programa ba lider suku no profesór sira atu motiva estudante sira hodi aplika.
“Programa parlamentu foinsa’e programa governu ne’ebé kada tinan lima fó oportunidade ba joven sira hodi aprende kona-ba lideransa” dehan nia, Sesta, (26/10/).
Nia argumenta, parlamentu foinsa’e hanesan organizasaun ne’ebé akumula foinsa’e timoroan hodi aprende no pratika lala’ok demokrasia, lideransa, direitu no devér sidadaun nian.
“Iha parlamentu foinsa’e, iha programa iha formasaun barak iha mós diskusaun no debate kona-ba direitu no devér” nia esplika.
Tuir rezolusaun ne’ebé iha, organizasaun parlamentu foinsa’e sei fó oportunidade ba ema na’in rua inklui ema ho defisiente, iha kada postu administrativu, ne’ebé atinje ona tinan 12 to’o 17.
“Kada postu ema na’in 2, feto 1 no mane 1, no fó oportunidade ba ema ho defisiénsia. kandidatu hirak ne’e nia idade husi 12 até 17, atu sai membru parlamentu foinsa’e”. Hatutan nia.
Iha fatin hanesan, estudante husi eskola sekundáriu tékniku vokasionál no 2 de Lospalos, Sonio Violha dos Santo Latu, sente kontente tanba bele hetan informasaun, no prontu hodi aplika programa refere.
“Ha’u sente kontente tebes tanba bele hetan informasaun, no prontu atu kompete ba kandidatu parlamentu foinsa’e nian, tanba oportunidade di’ak mai ami joven sira atu bele aprende no dezenvolve liu tan ami nia kapasidade” nia agradese no prontu.
Reportajen: Veru Fernandez.
Editor : Black Angel
