Lospalos: Estudante Eskola Sekundária Jerál (ESG) Jenerál Lere Anan Timur, sente arrepende loos tanba hatais farda eskola hodi fuma no dansa ne’ebé sai virál iha rede sosiál hanesan aplikasaun TikTok, nune’e sira husu deskulpa ba Públika no ba eis Tenente Jenerál reformadu Lere Anan Timur.
Estudante hirak ne’e uza atríbutu eskola nia halo tiktok iha loron iha loron 28 Maiu,maibé la espera vidio ne’e rasik sai virál iha rede sosiál iha loron 8 juñu.
Hafoin virál iha rede sosiál públiku kestiona maka’as no konsidera aktu ne’e hanesan hamoe no laiha moral tanba uza atributu eskola ne’ebé bolu naran eis rezisténsia luta ba libertasaun nasionál durante tinan 24 no Komandante FALINTIL- Forsa Defeza Timor-Leste (F-FDTL), Tenente Jenerál reformadu Lere Anan Timur.
” Ha’u hamutuk ho nia maluk sira seluk sente arrepende loos tanba halo aktu ida ne’ebé hamoe ami nia mahein Tenente Jenerál Lere Anan Timur, órgaun soberanu, Ministériu Edukasaun, Timoroan tomak, inan-aman no joven sira hotu inklui Lautém-oan en jerál, nune’e ami husu deskulpa ba hotu-hotu ka públiku ne’ebé sente sokadu. Ami mós promete sei la repete tan hahalok ne’e,” dehan Portavóz estudante husi klase desimu segundu ano turma B, programa Siénsia Sosiál no Umanitária, Fidelia Maria Soares, liuhusi konferénsia imprensa, foin lalais ne’e.
Portavóz estudante ne’e akresenta: “Ami arrepende tanba ami hafo’er eskola nia naran no dignidade liu husi ami nia video tik tok badak ne’ebé ami halo iha tempu livre no uza atributu eskola ne’ebé uza fotografia Pai Tenente Jeneral reformadu Lere Anan Timur nu’udar mahein ba eskola, ne’ebé espalla ona iha territóriu timor laran tomak no ba mundu”.
Nune’e, Estudante hirak ne’e mós husu ba estudante hotu iha Timor laran tomak atu labele halo tuir hahalok ne’e tanba la edukativu.
“Ami mós husu ba públiku atu hamoos no lalika share video ne’e ba mai tan, tanba ami nia hahalok ne’e hatudu imajen la di’ak iha Timor-Leste no Mundu”.
Iha fatin hanesan, Diretór ESG Lere Anan Timor Lospalos, Olandino Da Costa Belo mós lori eskola nia-naran husu deskulpa ba públiku no ba mahein Tenente Jenerál Reformadu Lere Anan Timur, Ministério Edukasaun tanba nia estudante sira utiliza media sosiál hodi hafoer Estadu Timor-Leste nia-naran.
“Nu’udar Diretór eskola Lere Anan Timor ho maluk profesór sira no estudante sira hotu ba entidade hotu liu-liu ba Tenente Jenerál Reformadu Lere Anan Timur, Ministériu Edukasaun, Orgaun Soberanu hotu ami husu deskulpa tanba ami nia oan sira nia atitude ne’ebé hatudu iha media sosiál hanesan aktu hamoe no hatun dignidade Estadu ne’e nian”, Diretór ne’e haklaken
Diretór ne’e afirma nu’udar manorin nain sempre eduka oan sira atu sai ema, maibé nafatin prontu simu no husu deskulpa ba públiku liga ba hahalok estudante hirak ne’e.
“Ami nu’udar manorin ami nunka hanorin ami nia-oan sira atu sai ema aat, maibé ami sempre hanorin sira atu sai ema ne’ebé diak tanba ne’e mak ami nia profisaun no ami nia vokasaun hanorin ema atu sai ema la’ós hanorin ema atu sai aat.”
Entretantu, nia dehan parte eskola mós bolu ona estudante nain-17 kompostu husi mane 7 no feto 10 nia inan-aman sira atu presta deklarasaun ba nia oan sira nia hahalok, nune’e ba futuru labele repete fali.
Reportegen: Veru
Editór: Helefatil
