Lospalos: Autoridade munisipal Lautém planeia sei hari sidade foun munisipiu Lautém nian iha area Kaicava-moko diresaun Estrada foun entre Aldeia assalainu suku Fuiloru no Aldeia Iraunu suku Com nia le’et, tanba sidade ne’ebe dadaun iha potensial ba area agrikultura.
Prezidente autoridade munisipal (PAM) Lautém Melio de Jesus informa katak governu lokal iha ona planu katak sei muda capital munisipiu ba iha fatin Kaicava-moko tamba capital munisipiu dadaun ne’e hari iha rai potensial ba agricultura.
“Planu ordenamentu teritoria munisipiu nian ita iha hanoin ona komesa ba futuru konabá nova cidade munsipiu Lautém ninian. Foin dadauk Vice Primeiru ministru e ministru kodenador ba asuntu social no ministru habitasaun komunitaria mai ami diskute ona,” informa nia ba jornalista Media Lautém-Post iha CCLN Lautém, Sesta(10/01).
Melio Argumenta, tamba sidade ne’ebé ita iha ne’e hari iha rai tetuk ne’ebe bokur, lolos ne’e ita utiliza ba area agricultura maibe ita utiliza fali ba edifisiu administrasaun nian. Tamba ne’e nia hatete, ita tenki hare ona ba futuru tenki halo sidade foun.
PAM Lautém ne’e haktuir, fatin ne’ebe sei sai nova sidade ne’e sei harí iha area entre suku Com aldeia Iraunu ho aldeia Asalaino suku Fuiloro nian tamba tuir estudu viabilidade ne’ebe iha hatudu katak fatin refere merese atu halo sidade iha ne’ebá.
“Ita identifika iha Kaicava-moko husi Com iha entre Iraunu no Asalino nian, tamba fatin ne’e tetuk no estrutura rai ne’e metin no fatuk deit. Tuir estudu viabilidade ne’ebé halo husi SEATOU no INLA ne’ebé estudu konaba ordenamentu teritorial nian no fatin ne’ebé sira halo ona estudu viabilidade ami sei ba hare atu halo levantamentu dadus ba futuru instalasoes nova cidade.” Katak PAM Lautém ne’e.
Entretantu iha Sesta(10/01) foin lalais ne’e autoridade Lautém kompostu husi diresaun Servisu Terras e Propriedade Servisus Cadastrais ( DSTPSC) no diresaun munisipal Koncervatoriu Servisu Registu Notariadu Munisipiu Lautem hare fatin refere no sei aprenzenta ba governu central hodi hahu halo prosesu ba futuru hari sidade foun ne’e.
Reportajen: Veru
Editor: Joenaca Tupa da Conçeicão.
