Lospalos: Prezidente autoridade munisipal (PAM) Lautém Melio de Jesus husu Lautém oan sira tempu ona atu hader dezenvolve rai Lautém.
Lia hirak ne’e nia hato’o hafoin sai orador ba Seminariu Munisipal motiva joven ba halo mudansa ne’ebe mak organiza husi Centru Dezemvolvimentu Juventude munisipiu Lautém no ChildFund Timor-Leste ho tema “Lautém hader”
Autoridade maximu munisipiu Lautém ne’e husu ba foin sae sira atu kontinua banati tuir ain fatin luta nain sira nian hodi kontinua luta ba prosesu konstrusaun estadu nian hahu husi rai Lautém.
“Prosesu konstrusaun estado ba aspektu dezenvolvimentu presija mos partisipasaun juventude nian, Atu nune ita bele alkansa ita nia objektivu komum hodi hasai povu husi kiak no mukit”. Dehan nia iha nia intervensaun hafoin sai Orador iha semenariu ne’ebé mak halao iha salaun CCLN Lautem, Sesta(10/01).
Nia afirma, uluk juventude hamutuk hodi liberta ita nia povu husi okupasaun agora papel juventude iha era ukun rasik an mak liu liu husi aspektu dezenvolvimentu. Tanba ne’e nia dehan tempu ona Lautém oan hader hodi tau hanoin hamutuk oinsa atu dezenvolve munisipiu Lautém ne’e ho diak iha futuru.
“Mensagen ba Lautém oan sira katak vizaun ida Lautém oan hader ne’e atu hafanu ita hotu, hahu husi juventude sira to’o sosiedade sivil, veteranu ferik no katuas sira no enjeral povu Lautém katak tempu too ona atu haluha ita nia diverzensia prinsipiu, imdividualista, ideologia, kor, suku, regiozu no seluk tan hodi mai tau hamutuk hanoin oinsa munisipiu Lautém ba oin.” Nia apela.
Iha fatin hanesan diretora Centru dezenvolvimentu Juventude Munisipiu Lautém Ruizina Viegas mos haktuir, katak foin sae Lautém tenki hader no prepara aan hodi luta ba lautém nia dezenvolvimentu iha futuru.
Nia dehan, liga ho filosofia Lautém oan hader ne’e, hafanu ami juventude sira atu haforsa grupu juventude sira liu husi formasaun. Mak hanesan gestaun organizasaun, lideransa organizasaun, administrasaun financas no seminariu. Ho nia tema geral Lautém oan hader.
“Liga ho tema nee atu fanu ita katak nudar Lautém oan hamutuk kontribui ba dezenvolvimentu iha munisipiu Lautém. Espera katak liu husi formasaun oin-oin ba juventude sira bele hafanu foin sae sira hodi kontribui ba prosesu konstrusaun estadu nian liu-liu oinsa atu dezenvolve rai Lautém iha futuru.” Dehan nia iha nia intervensaun.
Nia afirma, espetativa ne’ebé ita iha liu husi formasaun to’o mai iha seminariu ne’e ita hakarak sira bele hatutan fila fali ba nia maluk nebe la marka prezensa. No sira tenki envolve aan ba iha prosesu dezenvolvimentu.
Reportagen: Veru
Editor: Joenaca Tupa da Conçeicão
