Lospalos: Relasiona ho preukupasaun komunidade munisipiu Lautém nian, liga ho kondisaun estrada diresaun Postu Lautém ba kapital munisipiu ne’ebe grave ba bebeik. Prezidente Autoridade Munisipal(PAM) Lautém Mélio De Jesus tau ona komitmentu ba infraestrutura bazika liu liu Estrada nu’udar prioridade ba nia mandatu
Hafoin ekipa nasional husi Ministeiru Obras Púbilikas(MOP) parte Estrada halo ona verifikasaun ba Estrada Nasional Ligasaun Postu Lautém ba Postu Lospalos Vila, inklui ligasaun Lautém ba Com hodi hatama ba Dezeñu Enjenária detalladu (DED) no supmete ba grande progetus hodi loke prossesu tenderizasaun.
Mélio fiar no iha esperansa, katak estrada diresaun Lautém ba Lospalos sei konstrui duni iha tinan ne’e, tamba estrada refere programadu ona iha Orsamento Jeral Estadu(OJE) tinan 2024.
“Hau nia komitmentu mak infrastutura baziku ba komunidade Lautém, no hahu halao ona kontaktu ho ministeiru ne’ebe iha ligasaun ho infraestrutura baziku nian liu-liu estrada, tamba estrada refere ne’e programadu tia ona iha OJE 2024”. Katak Mélio ba Lautém-Post foin lalais ne’e.
Lider maximu munisipiu Lautém ne’e komprometidu sei kontinua halo esforsu no tentativa atu kontinua kontaktu ho parte MOP, maibe nia parte seidauk bele promote ba povu Lautém tamba estrada nasional ligasaun Lautém ba Lospalos tama iha kategoria projeto bo’ot no desizaun ikus sei determina husi Konsellu Administrasaun Fundu Infraestrutura(KAFI).
Maske nune’e prezidente autoridade Lautém ne’e kontinua fiar, katak Estrada ligasaun Lautém ba Lospalos sei konstrui iha tinan ne’e.
“Labele promete tamba desizaun ne’e iha reuniaun KAFI tamba presiza osan bo’ot, ne’ebe KAFI mak sei deside. Mais hau fiar katak konstrusaun estrada nasional Lautém mai Lospalos sei realiza iha tinan ida ne’e,” hatutan Mélio.
Ses husi ne’e lider Lautém ne’e haktuir, estrada urbana ligasaun postu administrativu to’o suku no aldeia sira tama ba iha kompetensia Munisipal nian. Tanba ne’e mesmu ho kapasidade orsamentu ne’ebe limitadu, nia parte sei tau nafatin iha Planu Aksaun Annual(PAA) municipal nian hodi kontinua defende iha komisaun revizaun orsamental.
“Estrada urbana husi postu, suku ba aldeia ne’e kompetensia munisipal nian, ne’e mos depende kapasidade orsamentu. Ita sei tau iha planu aksaun annual, depois lori ba ita defende iha komisaun revizaun orsamental, Mais agora prioridade liu mak estrada nasional ligadu husi Lautém Mai Lospalos ne’e.” Nia afirma.
Iha sorin seluk diretur servisu Munisipal Obras Públicas Munisipiu Lautém Abrao Vieira informa, iha loron 15 fulan Abril foin lalais ne’e, ekipa verifikasaun husi nasional parte Estrada halo ona verifikasaun ba estrada nasional ligasaun postu Lautém ba postu Lospalos vila, inklui ligasaun Lautém ba Com.
Tuir nia, dadauk ne’e detallu ba estrada ne’e iha ona DED(Dezeñu Enjenária detalladu) hafoin ne’e sei supmete ba grandes prozetus hodi loke prossesu ba tenderizasaun.
“Tuir dekretu lei no 3/2016 Munisipiu só toma konta ba estrada Munisipal, urbana no rural. Konaba estrada nasional husi Lautém mai Lospalos no Lautém ba Com, iha dia 15 de Abril husi nasional parte estrada nian mai verifika ona, prossesu iha ona DED depois sei supmete ba grandes prozetus no sei halo prosesu tenderizasaun.” Informa nia ba Lautém-Post iha nia knar fatin.
Diretor ne’e relata liga ho kompetensia munisipiu ba kontrusaun estrada rural no urbana, tuir planu iha tinan ne’e MOP munisipiu Lautém sei halo rehabilitasaun ba estrada urbana ho medida kilometru 8 iha kapital munisipiu, postu Lospalos Vila.
“Iha 2024 tau ona iha planu para atu hadia estrada urbana iha vila laran ho medida kilometru 8. Ne’ebe ita propoin ida ne’e nafatin ba nasional, se nasional hare iha osan ita bele ezekuta. Maibe konforme kapasidade finaseira governu nian.” katak diretor MOP minisipiu Lautém ne’e.
“hein katak neneik sei hadia hotu. Tamba Ministeriu Obras Públicas munisipiu Lautém no PAM Lautém ita iha interese makas ba dezenvolvimentu munisipiu Lautém no ba Parte hotu liu-liu estrada, eskola, no saude.” Nia hatutan tan.
Entretantu estrada husi diresaun trisula ba Tutuala, Lospalos ba Lore, Lospalos ba Iliomar, Buihimau ba Luro no Barikafa ba Dirimunu sei tama ba perioridade Planu Aksaun annual(PAA) 2025 hodi propoin ba grandes prozetus atu bele konstrui iha tinan tuir mai.
Reportagen: Veru
Editor: Joenaca Tupa da Conceição
