Tutuala: Dezenvolvimentu nasaun Timór-Leste la’ós dependente de’it ba mane maibé, nasaun nia prosperidade nudár timoroan hotu nia devér.
Dalabarak diskriminasaun monu iha sosiedade nia leet, feto mak sai alvo diskriminativu iha sosiedade no familia nia laran, tanba ne’e, tékniku Diresaun Nasionál Prevensaun Konflitu Komunitária (DNPKK), disemina informasaun kona-ba feto nia direitu no devér iha sosiedade, iha suku Mehara postu administrativu Tutuala, oinsá feto mós iha konsiénsia hodi kria pas no asegura nia an.
Xefe Departamentu husi Diresaun Nasionál Prevensaun Konflitu Komunitária (DNPKK), Ervaristo Moniz, hateten, diseminasaun ne’e atu espalla informasaun PAN (1325) kona-ba feto nia direitu no papél iha sosiedade.
“Atividade ne’e, atu espalla informasaun polítika (Planu Asaun Nasionál) PAN 1325 para sira bele komprende, oinsá komunidade sai produtivu, iha konsiénsia bele iha pas no estabilidade” dehan nia, Segunda, (17/10/).
Tuir dadus, feto no labarik barak hetan violénsia, tanba ne’e Diresaun Nasionál Prevensaun Konflitu Komunitária – DNPKK fahe informasaun kona-ba maneira prevensaun konflitu iha sosiedade no família.
Feto iha kapasidade atu dezenvolve nasaun maibé tanba de’it feto sempre hetan violénsia husi nia parseiru, entaun, ta’uk atu espresa nia matenek.
“Dala barak feto no labarik feto sai vítima ba violénsia. tuir dadus, feto ne’ebé hetan violénsia doméstika husi nia la’en hamutuk 70%. Feto sira iha kapasidade maibé labele la’o ba oin tanba sente ta’uk, tanba dezenvolvimentu nasaun la’ós mane de’it mak bele maibé feto mós bele”,
Xefe Suku Mehara, Ze Meigo Neto, sente orgullu tanba hetan oportunidade hodi hetan informasaun, no planeia transmite ba komunidade sira.
“Diseminasaun foin primeira vez halo iha suku ida ne’e, ha’u sei transmite ba komunidade iha suku mehara tanba papél feto importante iha sosiedade nia laran maibé dala-barak feto hetan diskriminasaun. Diseminasaun ne’e bele fó koñesimentu ne’ebé kle’an ba komunidade” Ze Meigo, planeia.
Administradór postu administrativu Tutuala, Albino de Araujo, agradese ba ekipa DNPKK tanba fahe ona informasaun ba komunidade, liu-liu ba feto sira hodi kompriende nia papél no dirietu iha komunidade nia leet.
“Diseminasaun kona-ba feto maluk sira nia papél ne’e importante. Diseminasaun ne’e, mane mós partisipa entaun mane sira bele kompriende feto nia papél no evita violénsia hasoru feto iha ida-idak nia família” dehan nia.
Reportajen : Veru Fernandes
Editor : Black angel
