Lospalos- Relasiona konfrontu joven suku Pairara ho aldeia Caporo ne’ebé rezulta joven ida hetan tiru, joventude suku Pairara, Postu administrativu Lautém lamenta ho deklarasaun Komandante Polísia Nasionál Timor-Leste (PNTL), munisípiu Lautém, Superentendete Polísia, Antonio do rego Fernandes.
Tanba tuir joventude sira katak deklarasaun PNTL la tuir faktu no realidade ne’ebé mak akontese iha loron 21 fulan-setembru 2023, tuku 7 kalan oras Timor-Leste.
Tuir Portavos Joventude Suku Pairara, Baltazar Cristiano Barros konta, lolos husi problema ne’e, iha loron 21 Setembru 2023 lokraik, bainhira joven na’in-rua husi Pairara ba hare futu-manu iha Aldeia Caporu no laiha intensaun atu buka problema.
Maibé bainhira joven sira fila husi futu-manu fatin, joven sira husi aldeia Caporo hakilar no hapara sira. Entaun sira para tiha motor, joven sira husi Aldeia Caporo ne’e baku lesuk no tuda joven ida husi suku Pairara.
Nia haktuir, nune’e sira halai husi Caporo mai suku Pairara, entaun bainhira to’o iha Pairara, familia, inan-aman, juventude Ira-Tchau no Leveno la simu ho hahalok husi juventude Caporo ne’ebé baku ema, maibé laiha motivu ruma.
Nia subliña, tanba ne’e joven sira hamutuk ho vitima ne’ebé hetan baku husi joven aldeia Caporo ho intensaun atu ba husu tu’ir suspeitu iha nia rezidensia kona-ba motivu husi baku ne’e.
“Maibé bainhira to’o iha Caporo, seidauk halo aksaun ruma, maibé joven ida husi Caporo ho naran Nicson hakilar no tolok uluk vitima ne’ebé hetan baku no bainhira hare joven sira husi Pairara tama ba, nia (Nicson) halo aksaun uluk hodi tuda joven sira husi Pairara, nune’e joven sira mos tuda hasoru nia, ikus mai resulta uma lima hetan estragus,” Deklara Portavoz Joventude, Suku Pairara, Baltazar Cristiano, liu husi komunikadu imprensa ne’ebé Lautem Post Assesu, kuarta, (27/9/2023).
Tuir nia afirmasaun, iha fatin akontesimentu ne’e, laiha polisia ida mak halo atuasaun ba problema iha momentu ne’ebá, maibé lia-na’in ka Konsellu Suku Pairara ni’an mak duni tu’ir joven sira no haruka fila.
Entaun ho esforsu Konsellu Suku ni’an, konsege hakalma joven sira no haruka sira fila husi fatin akontesimentu aldeia Caporo mai suku Pairara.
Nia reforsa, depois hakalma joven sira, Konsellu Suku ka Lia-na’in mak akompaña joven sira fila husi Caporu fila ba Pairara no bainhira joven sira atu tama ona ba Pairara, do’ok ona husi fatin akontesimentu ho distánsia kilometru-rua, mak Polísia husi Eskuadra Lautém ho karreta to’o ba no tiru kilat husi kotuk.
“Iha momentu ne’e Konsellu Suku ka Lia-na’in hamriik iha estrada klaran ko’alia ba Polísia dehan joven sira ha’u haruka fila ona, imi lalika mai lai, tanba sira ho masa, maibé Polísia ida hatan dehan tiu ses tiha para ami tiru,” Nia hateten.
Nia argumenta, ida ne’e mak kronolojia lolos, tanba la konkorda deklarasaun PNTL Lautém katak joventude mak halo asaun uluk, hafoin sira tiru.
“Ami mós diskorda ho informasaun husi Porta Voz PNTL, Superintendente Polisia Antonio da Luz iha Konferensia Imprensa ne’ebé publika mós Pájina PNTL ne’ebé hateten katak joven sira leno lampra ba polisia no tuda polisia, maka membru ida tiru advertensia ka tiru sae, maibe kala tiru sa’e tesik ba foho leten entaun kona Joven ida,” nia rezeita deklarasaun PNTL Lautém.
Nia fundamenta, Informasaun ne’ebé Superintendente Polísia Lautém hatete ne’e lalos.
“Tanba tu’ir kronolojia lolos ne’e, Polísia mak leno lampra no leno lampu kareta nian ba joven ida-nia matan laran no tiru kedas iha estrada klaran, ran mos fakar hela iha ne’ebá, la’ós iha foho leten,” tenik Portavoz.
Antes ne’e Comandante Polisia Munisipiu Lautém Superentendete Polísia, Antonio do rego Fernandes hateten, relatóriu ne’ebé nia simu, iha loron 21 fulan Setembru, maiju-menus oras tuku 7 kalan mosu akontesimentu ida iha aldeia Caporo ne’ebé Involve Joven na’in-rua ho inisial MB no JL ne’ebé mak deskonfia nu’udar membru Artemarsiais no arte-ritual nian ne’ebé hahú provoka malu.
“Primeiru akontese ne’e iha fatin futu manu entre joven ida ho inisial MB ho JL nudar suspeitu ne’ebe maka sira provoka malu depois hasai foto. depois ida inisial MB ne’e nia hasai foto ba Señor JL ne’e, depois MB ne’e ser tutan fali ba nia maluk sira iha Dili no mós iha fatin seluk tan”. Haktuir Komandante Munisipiu ne’e ba Lautem Post iha Sesta, (22/09).
Nia hatutan, Entaun ho intensaun ida-ne’e JL ne’e ba husu, tanba sa mak hasai nia foto no ser tutan ba malu, no derepente deit nia kolega ida ho inisial AG ne’e tuku tiha MB ne’e. Maibé akontesimentu iha tempu loraik ne’e, seidauk iha keixa ruma ba parte Polísia.
Hafoin akontesimentu ne’e, nia hateten Joven ida naran MB ne’e ba liu iha suku Pairara, depois alerta kedas ba ninia aman sira no mós nia maun sira hamutuk purvolta ema besik na’in-50 ne’e mai ho katana, surik no fatuk, depois mai iha aldeia Caporo hodi asalta uma komunidade ni’an hamutuk 6.
Nia informa, hafoin kontesimentu ne’e parte vitima ne’ebé mak hetan assaltu ba nia hela fatin kontaktu kedas ba PNTL eskuadara Lautém, nunee Ekipa PNTL ne’ebé kompostu husi membru na’in-lima, halo kedas patrollamentu iha fatin akontesimentu iha aldeia Caporo ne’e.
“Maibé iha ne’ebá ema sira ne’ebé mak mai halo asaun ne’e sira retira husi fatin aldeia Caporo ninian, depois sira ba iha sira-nia fatin destinasaun ba iha suku Pairara ninian”. Katak komandante ne’e.
Nia relata, entaun Polísia ne’ebé mak halo patrolla ne’e la’o tuir ba iha suku Pairara. Iha dalan klaran ema sira-ne’e hare Polísia nia kareta, entaun sira leno kedas Polísia ho lampra, depois sira tuda dadauk.
Nia argumenta, tanba deit distansia entre Polísia no suspeitu sira besik malu, entaun ema sira-ne’e iha liu estrada ne’ebe subida no sira iha liu leten depois mak sira tuda tun Polísia ho fatuk. Entaun membru Polisia nain lima nene komu satan fatuk labele, entaun sira ses an husi ne’eba.
“Depois sira hakilar hodi fó advertensia hodi dehan para ami Polisia. Maibé ema sira-ne’e lakohi rona advertensia ne’ebé mak ho verbalmente Polísia hato’o ba sira. Entaun iha momentu ne’ebá Polísia mos hasai kilat hodi tiru advertensia hodi tiru sa’e ba leten. Maibé komu sira iha rai subida no iha as nia leten, entaun kala armas ne’e kilat musan ne’e deskuidu hodi kona joven ne’e,” kata nia.
Nia akresenta, baibain ne’e Polísia tenke ser tiru ameansa, la’ós tiru nia. Maibe tanba de’it dala-ruma sira iha liu laletek, entaun kilat musan ne’e hanesan diskuidu entaun ba kona liu joven ida iha ninian ain tuur kraik ne’e depois rejulta vitima ne’e kanek.
Maibé hafoin tiru ne’e, nia afirma, iha tempu ne’ebá membru Polísia haree katak nia monu latan ona, entaun fó kedas assisténsia lalais hodi tula ho kareta Polísia ni’an ne’e ba iha Postu saúde Lautém, depois haree ba kondisaun la di’ak, entaun kontinua ba iha ospital referal Baucau no kontinua kedas ba hostital nasional Dili.
Tuir relatóriu ne’ebé, Komandante ne’e, asesu katak entre membru Polísia na’in-lima ne’e, iha membru nain-rua maka tiru hasoru Joven sira, no relatóriu ne’e Komandu munisípiu Lautém hasa’e ona Komandu Jeral hodi hein prosesa tuir mai.
“Depende ba desizaun husi komandu bazeia ba lei uza forsa ninian, depois ba lei hotu hotu. Tanba ita hotu hotu hanesan iha lei nia okos. Horsida ita prosesu, ita investiga, depois mak ita haree verdade ne’ebe lolos mak ida ne’ebe”. Dehan nia
Nia adianta, dadauk ne’e komandu Polisia Munisípiu Lautém assegura ona autór sira-ne’ebe mak involve an iha asaltu entre joven iha Pairara inklui membru Polísia ne’ebe mak halo tiru hasoru joven sira iha Polísia Eskudra Lautém.
“Ita assegura ona parte rua ne’e no vitima agora dadauk tratamentu hela no suspeitu na’in hira ne’ebe mak inisiu provoka malu to’o baku malu ne’e agora assegura ona iha eskuadra Lautém depois ita nia membru PNTL ne’ebe maka halo atuasaun ne’e mos ita assegura ona, depois Komandu Jerál mós forma ona ekipa investigasaun ida, depois ita kontinua halo investigasaun kona-ba atuasaun ida ne’e”. katak nia
Alemde ne’e, Komandu munisipiu Lautém mos orienta ona ekipa investihasaun husi SIK(Serbisu Investigasaun) Munisipiu Lautem hodi rekolla dadus iha terrenu kona ba assaltu entre Joven inklui membru Polisia ne’ebé tiru hodi submete ba prossesu investigasaun nian.
Hafoin akontesimentu ne’e, iha sesta semana kotuk Komandante Jerál PNTL, Komisáriu Jerál Polísia, Henrique da Costa orienta ona Departamentu Justisa forma ekipa hodi investiga kazu tiru joven iha Pairara
Orientasaun ne’e nia hasai liu husi despaixu ho númeru 441. CG-PNTL/IX/2023, hodi orienta ba Inspetór Jerál no Departamentu Justisa PNTL atu forma ekipa hodi hakle’an investigasaun ba kazu okum PNTL tiru joven, Martinho Gonsalves, iha área Pairara, suku Maina I, Postu Administrativu Lautém, Munisípiu Lautém.
Portavós Komandu Jerál PNTL António da Luz informa iha prosesu Investigasaun mak rezultadu hatudu katak kuandu kazu ne’e krime, Komandu Jerál sei kontinua prosesu ne’e ba Ministériu Públiku hodi hetan prosesu kontinuasaun”,
Komandante da Luz hateten membru PNTL ne’ebé momentu ne’e halo atuasaun hodi tiru pistola hodi rezulta joven ida ho kanek gravé, membru ne’e mak ho inisiál AR.
“Sim, ita-nia membru ne’e agora daudaun asegura ona iha Komandu PNTL Lautém, nune’e nia labele halo movimentu ba mai to’o hein investigasaun”, refere Notísia ne’ebé Lautém Post asesu hosi portal Agéncia TATOLI, I.P
Reportagem : Ekipa Lautém Post
https://potensmedel-apoteket.se/bestallning-viagra-generisk-recept-fri/
