ILIOMAR: Komunidade husi Larimi Lamenta, prosesu rehabilitasaun mini merkadu iha aldeia Larimi suco Caenleu, postu administrativu Iliomar liu ona prazu husi kontratu ne’ebe determinadu. Maibe to’o ohin loron obra ne’e seidauk bele finaliza.
Xefe aldeia Larimi Manuel Da Silva haktuir rehabilitasaun mini merkadu Larimi hahu rehabilita husi inisiu fulan Abril ho durasaun kontratu fulan 3. nia hateten tuir kontratu ne’ebe iha, tuir lolos iha inisiu fulan Jullu bele entrega ona ba komunidade sira atu utilize hodi fa’an sira nia produto maibe obra refere seidauk finaliza to’o ohin loron.
Autoridade aldeia ne’e explika, mini merkadu refere sai hanesan centru ba cirkulasaun ekonomia ba komunidade sira husi munisipiu Tolu, mak hanesan munisipiu Lautém, Baucau no Viqueque ne’ebe mak utilize centru mini merkado ne’e hodi halao atividade negosio.
“Rehabilitasaun merkadu iha fulan abril, iha kontratu fulan tolu maibe seidauk hotu. Merkado ne’e hanesan merkadu sentu ba munisipiu Lautém, Baucau no Viqueque ne’ebe mak mai konsentra iha nee. Wainhira diak ami sei fa’an ami nia produtu lokal sira hanesan haré no produtu lokal sira seluk.” katak xefe aldeia ne’e.
Hatan ba preukupasaun ne’e fasilitador sosial postu administrativu Iliomar Elio Pereira konfirma, rehabilitasaun mini merkadu Larimi ne’e seidauk bele finaliza tuir durasaun kontratu ne’ebe iha tanba tekniku sira imfrenta hela dezafio iha prossesu rehabilitasaun nian liga ho kondisaun Estrada no klima ne’ebe mak la favoravel.
Maibe fasilitador ne’e garante iha fin husi fulan Agustu ne’e bele finaliza ona progetu rehabilitasaun mini merkadu ne’e, tanba dadaun ne’e prossesu rehabilitasaun mini merkadu ne’e atinji ona 65%.
“Prosesu rehabilitadaun mini merkadu Larimi, prosesu aprovizionamentu hahu husi fulan 4 liu ba ho durasaun fulan 3 tolu. Maibe tamba kondisaun estrada no klima ladun permite, ne’ebe obra ne’e la bele hotu tuir tarjetu ne’ebe iha. Maibe iha fin husi fulan outubru tinan ne’e ami bele finaliza, tamba progresu to’o ona 65%. Hela deit nia kakuluk no pinta.” Dehan fasilitador sosial postu administrativu Iliomar ne’e ba Jornalista Media Lautém-Post.
Entretanto rehabilitasaun ba mini merkadu ne’e kompostu mos ho fatin lixu, inklui ho haris fatin. Progetu refere hetan apoiu finansiomentu liu husi Programa Nasional ba Dezemvolvimentu Suku (PNDS) ho total orsamentu hamutuk rihun 20 resin.
Reportagen: Veru.
Edidotor: Joenaca Tupa da Conceição.
