Lospalos: Motorista no komunidade Lautém preokupa ho kondisaun ponte Motolori tamba dadaun ne׳e hahu ona fruzu, kuak no namdoras iha tempu udan.
Komunidade Lautém Deonildo Boavida hateten, kondisaun ponte ne׳e difikulta tebes ba movimentasaun transporte públiku no privadu sira wain hira liu ponte refere.
Tamba ne׳e, nia husu ba autoridade relevantes sira atu toma atensaun ba kondisaun ponte ne׳e.
” Ladun nyaman ba ponte ne׳e tamba kuak hotu ona, ne׳ebé se autoridade lokal kuandu la tau matan bele fo asidente ne׳ebé ita la espera liu- liu sira ne׳ebé mai husi rai dok, sira lahatene bele akontese dezastre .” dehan Deonildo Boavida Caetanu ba Lautém-Post.
״tamba ne׳e, husu ba boot sira iha ne׳e karik bele buka meios oinsa bele rezolve lalais ida ne׳e para komunidade sira lao ho seguru.” Nia rekomenda.
Hatan ba kestaun ne׳e Prezidente Autirodade Munisipal (PAM) Lautém Melio De Jesus konfirma, katak nia parte orienta ona servisu munisipal obras públika Lautém sei monta sinais ba estrada sira ne׳ebé fó risku ba komunidade sira.
” Hau orienta ona diretor servisu munisipal obras públikas no diresaun transporte para atu tau sinais ba estrada refere. Ne׳ebé Prosesu adiantamentu orsamentu kuando levanta ona sira komesa tau ona sinais ba fatin sira ne׳ebé fó risku no mos fatin sira ne׳ebé sei halo konstrusaun.” Katak PAM Lautém Melio De Jesus ba Lautém-Post.
Entretantu ponte Motolori rekonstrui iha tianan 2002 husi Forsa Japones ne׳ebé hahao misaun pas (ONU) iha munisipiu Lautém hafoin akontese inundasaun ne׳ebé kauza ponte ne׳e kotu.
Ponte refere rekonstrui ho karakter urijente ho durasaun minimu aguenta too tinan 10 ne׳ebé mak utiliza ona durante tinan 20 resin no dadaun ne׳e ho kondisaun fruzu no kuak.
Reportagen: Veru.
Editor: Joenaca Tupa da Conceição.
