Luro: Relasiona ho preukupasaun komunidade Postu Administrativu Luro nian liga ba kondisaun estrada husi diresaun postu Luro ba suku Lakava too suku Wairoke ne’ebé mak sei kontinua aat, serbisu munisipal obras públikas (MOP) Lautém sei hapara kontratu husi kompañia Perekiki tanba abandona ona serbisu durante fulan 6.
Administrador Postu Administrativu (APA) Luro Gaspar Xavier informa, kondisaun estrada husi suku Wairoke no Lakawa kontinua aat, no wainhira tempu udan mota tun difikulta komunidade sira atu asesu ba postu Luro liu-liu difikulta tebes ba estudante sira atu asesu ba eskola.
“Estrada husi Kotamutu ba Lakawa ne’e aat total, tamba iha parte mota laran ne’e rai monu no fatuk boot taka dalan entaun komunidade sira labele liu, wainhira iha tempu udan difikulta tebes estudante sira atu asesu ba eskola.” Dehan Administrador Postu Administrativu (APA) Luro Gaspar Xavier ba Lautém-post.
Autoridade Postu Luro ne’e hateten, relasiona ho preokupasaun ne’e lider lokal sira aprezenta bei-beik ona ba Konseillu Konsultivu Munisipal (KKM) Lautém maibe seidauk iha solusaun.
Tamba ne’e nia dehan, lider komunitariu sira inklui administrador postu Luro husu ba obras públikas munisipiu nian atu diretamente ba iha terenu hodi haree.
“Xefe suku no xefe aldeia kada semana hatoo ba postu no postu kontinua hatoo ba konseillu konsultivu munisipial para ita hotu tetu, nomos liga ba obras públikas atu sira bele ba haree rasik iha ne’ebá para bele hatoo ba obras públikas nasional atu lori ekipamentu para bele hadia dalan ne’e.” Katak autoridade postu Luro ne’e.
Hatan ba preukupasaun ne’e, diretur servisu munisipal obras públikas munisipiu Lautém Abrao Vieira konfirma, estrada diresaun suku Lakawa too Wairoke iha kompañia rua mak halo konstrusaun, maibe nia dehan, kompañia ida seluk dadaun ne’e abandona servisu durante fulan 6 ona.
Nia afirma, tamba ne’e servisu munisipal obras públika sei relata ba nasional hodi hapara kompñia ne’ebé abandona serbisu refere hodi halo fali tenderizasaun ba kompanha seluk.
“Estrada husi Lakawa ba Wairoka iha kompañia rua mak serbisu iha ne’ebá kompañia Iliesaun serbisu hotu ona, no kompañia Perekiki kontratu tinan rua ona ate agora seidauk finaliza no abandona servisu fulan 6 ona.” Nia haktuir
“Ne’ebé servisu obras públikas munisipal sei rekomenda ba obras públikas nasional para hapara nia servisu hodi halo tender ulan nunee bele halo estrada ne’e inklui ponte.” Nia subliña.
Dadaun ne’e estrada husi diresaun postu administrativu Luro ba suku Lakawa too suku Wairoke ne’ebé sei kontinua aat, kuaze kilometru 15 inklui ho ponte ho nia medida metru 10.
Entretantu relasiona ho kestaun ne’e Jornalista Lautém-Post seidauk halo konfirmasaun ho kompaña Perekiki tamba okupadu ho servisu seluk.
Reportagen: Veru.
Editor: Joenaca Tupa da Conceição.
