Lospalos: Laiha ona atividade durante semana 3,komunidade Aldeia Bemoris Preukupa kompaña Broven unipessoal L.da abandona progetu konstrusaun ponte Sikal.
Hafoin kompañia Broven unipessoal L.da sobu ponte Sikal ligasaun Bemoris ba merkadu iha semana 3 ikus, atividade iha terrenu paradu no difikulta movimentasaun públiku.
Komunidade Bemoris Justino Pinto informa, Progetu Konstrusaun ponte Sikal durante semana tolu ona kompaña la halo ona atividade iha terenu.
Tuir nia situasaun ne’e difikulta tebes movimentasaun transporte publiku no privadu sira, liu liu difikulta komunidade sira ne’ebe asesu ba merkadu no Centru Saude wainhira lori moras ruma.
Tamba ne’e nia husu atu kompaña ne’ebe kaer obra ne’e atu bele aselera lalais serbisu hodi finaliza progetu konstrusaun ponte ne’e.
“durante semana tolu resin ona sira la serbisu, ne’ebe agora ita atu liu mos labele, moras ruma mak atu ba lalais mos araska tamba kareta liu labele. So tum-tum ho motor mak bele liu, ne’ebe husu kompanha atu aselera para komunidade bele asesu ho diak.” Dehan Justino ba Lautém-Post iha segunda(03/08) ohin.
Iha sorin seluk komunidade Aldeia Bemoris Rita Kolisina Marques Fernandes sente triste, tamba kondisaun ponte ne’ebe seidauk normaliza ho diak difikulta tebes movimentasaun komunidade nian liu liu atu asesu ba eskola no merkadu.
“Sente triste tamba ponte ne’e hadia ona maibe ami hare progetu ne’e han ona tempu naruk. Ida ne’e difikulta tabes ba movimentu komunidade nian, tamba labele halo movimentu hodi asesu ba merkadu no difikulta labarik sira atu ba eskola.” Katak Rita ba Lautém-Post iha segunda(03/08) ohin.
Hatan ba ne’e diretor kompaña Broven unipessoal L.da Alestino Castaneiro Fernandes hateten durante ne’e kompanha halo hela serbsiu maibe iha nia rezidensia tamba fatin iha terenu ladun favoravel ba ekipa atu halo serbisu.
“Durante ne’e serbisi la para, tamba fatin iha terenu klot espasu la to’o atu serbisu iha ne’eba. Ne’ebe kompanha serbisu iha fatin kompanha nian.” Informa Alestino ba Lautém-Post iha nia regidensia segunda(03/08) ohin.
Nia hatutan tan, “dadaun ne’e ekipa nafatin serbisu hodi prepara besi ho kaixa, kuandu hotu bele lori ba terenu hodi kontinua serbisu.” Katak Alestino.
Diretur kompaña ne’e informa, nia parte garante prosesu ba konstrusaun ponte ne’e sei remata iha fin fulan Novembru nian tuir kontratu ne’ebe iha.
“Tuir kontratu hahu iha dia 1 de Jullu to’o 31 de Dezembru 2024, maibe kompanha sei esforsu no bele remata iha fin fulan Novembru, ou inisiu Dezembru, garante katak sei remata tamba kompanha prepara ona ekipamentu.” Nia argumenta.
Entretantu Progetu kontrusaun Ponte sikal ne’e konstrui husi kompaña Broven unipessoal L.da ho total Orsamentu $ 98.108.19 fatin progetu Aldeia Bemoris, Suku Fuiloru, Postu-Administrativu Lospalos, Munisipiu Lautém ho numeru kontratu 06/pdim/vii/2024.
Reportagem: veru.
Editor: Joenaca Tupa da Conceição
