LOSPALOS: Povu agrikultór iha Aldeia Larimi, Suku Caenleu, Postu Iliomar, nia natar ektare-rua hetan estragu tanba morru protensaun ba mota Odomau laiha kondisaun.
Xefe Grupu Agrikultura iha Suku Caenleu, Adriano Savio, informa natar hamutuk ektare rua ne’e hetan estragu tanba impaktu laiha morru protesaun ba mota Odomau.
“Dezafiu ne’ebé ami hasoru mak laiha morru protesaun no kondisaun irrigasaun mós ladun di’ak. Nune’e mota estraga ami nia natar ektare rua. Nune’e ami husu Servisu Agrikultura Munisipál no Ministériu Agrikultura, Peskas, Pekuaria no Floresta (MAPPF) atu konstrui morru protesaun hodi ami bele halo produsaun ba hare,” dehan nia ba Lautém Post iha suku ne’e, ohin.
Maske, nia dehan halo ona natar kuaje tinan barak ona, maibé Governu la apoia fasilidade hanesan traktór.
“Laiha traktór desde 2007 to’o agora, maske uluk husi FDC no programa Integrál Crop Management mak apoia rua, maibé agora ida deit mak funsiona tanba ida avaria ona. Husu atu apoia mós traktór”, nia sujere.
Planu sosa hand traktór, konstrui morru protesaun no irrigasaun
Hatan ba preokupasaun ne’e, Diretór Servisu Agrikultura Munisipál Lautém Albertino Jerónimo, dehan iha ona planu atu sosa hand traktór no halo konstrusaun ba morru protesaun sira no irrigasaun. .
“Governu planu atu ba oin sosa tan hand traktór ba povu agrikultór sira ne’ebé halo natar no hadia mós irrigasaun sira hodi hasa’e produsaun rai laran. Mai Munisipiu Lautém ne’e maizumenus unidade 20, maibé depende ba grupu agrikultór sira”, nia promete.
Iha sorin seluk, Sekretáriu Munisipál ba Administrasaun no Finansa, Francisco Dos Santos, hateten nian parte sei aprezenta problema agrikultór sira ba Governu hodi bele tau atensaun.
Entertantu totál área natar iha Larimu hamutuj ektaemre 35, husi númeru ne’e agrikultór uza de’it ektare 15, ektare rua hetan estragu no ektare 20 abandona tanba laiha irrigasaun
Reportajen :Veru
Editór: Helefatil
