Lospalos: Bazeia ba karta sirkular husi Ministeiru Edukasaun (ME) nian, Serbisu edukasaun munisipiu Lautém hapara professor kontratadu no volontariu sira ne’ebe mak selu husi kontribuisaun Inan Aman nian hamutun nain 104 husi eskola 10 iha munisipiu Lautém.
Diretur serbisu edukasaun munisipiu Lautém Rui Manuel Miranda Da Costa Branco informa, total professor kontratadu no volontariu sira ne’ebe mak Ministerio Edukasaun hapara ona iha munisipiu Lautém hamutuk nain 104.
Husi total ne’e nia hateten, Kompostu husi professor kontratadu husi Pre-eskolar hamutuk 84 no kontratadu husi EBC to’o Secundario hamutuk 20.
“Profesores kontratadu sira iha municipiu Lautém ne’ebe ministeriu edukasaun hapara hamutuk ema nain 104 ne’e kompostu husi profesor kontratadu husi pre-eskolar nain 84 no kontratadu husi EBC no ESG nain 20,No provizoriu sei la halo nia servisu maibe hein deit desizaun husi ministeriu.” Katak nia ba Lautém-Post foin lalais ne’e.
Nia deklara bazeia ba Karta sirkular ne’ebe ministeriu fo sai, servisu edukasaun municipal Lautém liu husi servisu inspesaun foti ona dadus hodi hapara professor kontratadu no kazuais husi eskola 10 iha Munisipiu Lautem
Liga ho assuntu ne’e, superintendente edukasaun munisipal Lautém Jorge Da Costa Valensa haktuir dadaun ne’e total eskola iha Lautém hamutuk 149 no husi numeru eskola ne’e, parte inspesaun foti ona dadus balun husi eskola 10 ne’ebe mak profizoriu hapara ona sira nia professor kontratadu no kazuais sira hamutuk nain 104.
“Total eskola iha municipiu Lautém hamutuk 149, no husi númeru eskola refere ita foti ona dadus balun husi eskola 10 ne’ebe mak dadaun ne’e provizoriamente hapara sira nia profesor kontratado no mos kazuais sira.” esplika Superintendente ne’e.
Jorge komfesa bazeia ba sirkular ministerio nian, Ministeiru Edukasaun hapara ona professor kontratadu ministeriu nian inklui mos kontratadu ne’ebe mak eskola selu rasik liu husi kontribuisaun inan aman nian.
“Hapara profesor kontratadu ne’e bazea sirkular ne’ebe ministeriu hasai tantu profesores kontratadu nasional no mos kontratu ne’ebe eskola fo liu husi kontribuisaun inan aman nian, maibe ministerio sei responde ba problema sira ne’e.” Nia esklarese
Alen de ne’e superintendente ne’e afirma desizaun ne’ebe mak ministeriu hasai liu husi sirkular ne’e efeta tebes ba prosesu aprendizajen, mesmo prosesu aprendizajen dadauk ne’e lao ona.
“Sirkular ne’ebe maka Ministerio Edukasaun hatun ne’e nia efeitu maka prosesu aprendizajen iha aula labele lao diak, mesmo que prosesu aprendizajen lao ona.” Haktuir nia.
Entretanto dadauk ne’e total profesores permanente iha Munisipiu Lautém hamutuk nain 714, profesor kontratadu nasional iha nain 213, kontratu municipal nain 29 no volontariu iha ema nain 68.
Reportagen: Nandez Veru
Editor: Joenaca Tupa da Conceição levitra générique belgique
