Lospalos: Atu hasae komunidade nia rezilensia ba mudansa klimatika, organizasaun não governamental (ONG) childfund Timor-Leste hamutuk ho ONG fraterna no komunidade suku Cacavei kuda ai-oan hamutuk 400 (atuas haat) hodi konserva bee matan Vatapapan, iha aldeia Lai-ara suku Cacavei.
Xefe programa childfund Antonio Rozario hateten, objektivu husi kuda ai-oan ne’e atu koncerva bee matan no oinsa atu proteze rai halai iha futuru.
“Programa ne’e halai liu-ba oinsa atu proteze dezastre naturais no oinsa atu koncerva natureza tamba ne’e ita mai kuda ai-oan ho objektivu atu proteze bee matan ne’ebé iha, nune’e labele maran iha futuru no laos deit atu koncerva bee matan deit maibe oinsa atu proteze rai halai .” Nia esplika.
Iha sorin seluk, Xefe suku Cacavei Mario Dias Quintas, agradese ba autoridade munisipal inklui ONG Childfund Timor-Leste no ONG Fraterna, ne’ebé mak ho interese tebes hodi koncerva bee matan no proteze rai halai liuhusi atividade kuda ai-oan.
“Ami nia orgulu bo’ot ba ONG lokal no internasional ne’ebé ho hanoin diak suporta komunidade sira hodi koncerva ita nia bee matan, ne’ebé kada loron komunidade konsumu.” Informa nia ba Jornalista Lautem-Post.
Iha fatin hanesan, Secretario munisipal planeamentu investimentu no dezenvolvimentu integradu, Tiborsio Dos Santos, husu ba komunidade suku Cacavei atu kuida nafatin ai-oan hirak ne’e, nunee bele konserva bee matan sira no prevene rai halai iha futuru.
“Hatoo ba komunidade suku Cacavei atu bele haree no tau matan ba ai-oan sira ne’e, tamba liuhusi kuda ai-oan bele koncerva bee matan iha futuru.” Nia apela.
Entretantu tipu ai-oan 400 ne’ebé komunudade sira kuda hodi konseva bee matan Vatapapan iha sucu Cacavei kompostu husi Ai-Turi, Kiar, no Ai-Saria.
Jornalista: Veru.
Editor: Joenaca Tupa Da Conceição.
