LOSPALOS- Organizasaun non governamentál (ONG) Centru Dezenvolvimentu Juventude (CDJ) Munisípiu Lautem halo introdúsaun liuhusi kapasita ba foin sa’e sira hodi atu halo relasaun ho saudavél, nune’e prevene aan husi moras HIV-SIDA.
Diretór Nasionál Dezenvolvimentu Juventude Lautém, Firmino Dias Quitas informa objetivu husi formasaun ne’e atu fahe informasaun kona-ba oinsá foinsa’e sira bele preve aan husi moras HIV-SIDA, Kaben sedu no oinsá halo relasaun ho saudavél.
“Halo formasaun relasaun saudavél ne’e tamba ita haree problema nasaun enfreta liuliu mak joven sira por kauzu husi kaben sedu, moras HIV SIDA, Droga, relasaun la saudavel, atu responde ita presiza kapasita joven sira,” dehan Diretór ne’e.
Iha biban ne’e, Sekretáriu Munisipál Asuntu Sosiál no Organizasaun Komunitáriu, Zeferino Dos Santos husu ba foinsa’e sira atu kontinua habelar informasaun ba komunidade sira atu bele preve aan husi moras HIV-SIDA.
“Informasaun ne’ebé ita boot sira simu tenke lori no implementa iha tereñu liuliu kontinua habelar informasaun ba joven sira seluk no ba komunidade sira atu oinsá bele moris ni halo relasaun saudavél”, nia sujere.
Entretantu, Formasaun ne’e hetan partisipasaun husi foinsa’e sira hamutuk nain 31, durante loron lima, no hetan fundu husi Ministériu Juventude Desportu Arte no Cultura (MJDAC) ho totál $2.281, implementa husi Centru Dezenvolvimentu Juventude Munisipiu Lautem ( CDJ-LTM).
Reportagen:Veru
Editór : Helefatil
