Lospalos: Servisu Saude Munisipal Lautém rezista afetadu husi Moras HIV-SIDA hamutuk cazu sanolu Resin Hitu, kompostu husi adultus nain 8, jovens nain 9 inklui labarik ho idade tinan 2 nain ida. Husi numeru ne’e nain 4 la konsegue salva to’o lakon vida.
Responsavel HIV-SIDA Munisipiu Lautém Adina Do Carmo informa hahu husi tinan 2013 to’o 2024 Sentru saude Munisipiu Lautém regista ona cazu moras HIV-SIDA hamutuk nain sanolu resin hitu.
“Moras HIV-SIDA iha Lautém husi 2013 ate 2024 ami rezista hamutuk ema nain 17 no husi numeru ne’e nain 4 mak mate, feto 1 mane nain 3.” Katak Responsavel HIV-SIDA Munisipiu Lautém ba Jornalista Lautém-Post foin lalais ne’e.
Tuir nia husi total kazu ne’e inklui mos labarik minoridade ho otas tinan 2 nain ida tanba kauza husi inan aman ne’ebe mak afetadu virus HIV-SIDA .
“Sira ne’e maioria adultu nain 8, estudantes nain 9 no mos iha labarik tinan 2 ida ne’ebe hetan husi nia inan ne’ebe afetadu HIV-SIDA.” Nia esplika.
Liga ho numeru afetadus ne’ebe hahu sae no lao livre iha komunidade nia le’et, Responsabel HIV SIDA munisipiu Lautém ne’e husu ba komunidade sira atu preven a’an husi moras HIV SIDA.
Tanba ne’e nia husu ba foin sae sira atu labele halo relasaun sexual arbiru tamba dadaun ne’e munisipiu Lautém rezista ona kazu HIV-SIDA ne’ebe hahú a’as iha Lautém.
“Atu prevene moras HIV-SIDA ne’e iha opsaun tolu mak ABC. Abstinence, labele halo relasaun seksual wainhira seidauk kaben, Zezum no uja platiku protezidu ka kondom nune’e labele afeta moras ne’e.” Nia esplika.
Alen de ne’e, nia haklaken pasiente hirak ne’e mai husi postu Adminstrativu 5 mak hanesan Postu Administrativu Lospalos, Lautém, Luro no Iliomar. Uniku Postu Administrativu Tutuala mak laiha kazu afetadus.
“Dadaun ne’e pasiente sira ne’ebe afetudu ne’e hetan hela asistensia mediku husi doutor sira, tamba aimoruk sufisiente hela.” Nia hakotu.
Reporter: Veru.
Editor: Joenaca Tupa da Conceição.
