Lospalos: Tinan ne’e, Timoroan komemora loron konsulta popular ba dala 25 iha territóriu nasionál inklui munisipiu Lautém, iha komemorasaun ne’e, juventude rezisténsia husu foin-sa’e Lautém-mocor atu banati tuir jovens rezisténsia sira, kria pás, foku ba dezenvolvimentu nasaun.
” ITA hetan ona independénsia liu husi referendu ida ne’e, husu ba juventude sira, aproveita ukun-an ida ne’e, banati tuir rezisténsia sira nia ain-fatin hodi kontribui ba dezenvolvimentu”, Juventude rezisténsia, Armenio Monteiru, husu ba foin-sa’e Lautém-oan.
Nia haktuir, Timor-Leste nia ukun an ne’e la’ós hetan ho dalan pasífika, maibé, ultrapasa dezafiu lubuk ida.
“Joven sira presiza hatene, hahú prosesu luta husi 1975 too 1999, tanba ukun-an ne’e la’ós fo liuhosi bandeja, maibé liu husu prosesu naruk”, joven rezisténsia fó hanoin.
Xefe suku Cacavei, Mario Dias Quintas, haktuir, konsulta popular ne’e loron importante ba timoroan sira atu halo reflesaun, tanba liu husi konsulta popular, povu Timór-Leste deside nia independénsia.
“Ohin loron importante ba ita hotu, hodi hatudu nafatin ba ita nia jerasaun oin mai, tanba liu husi loron konsulta popular ne’e, ita hakotu okupantes sira iha ita nia rain, xefe suku relembra.
Entretantu, komemorasaun loron konsulta popular ba dala 25 iha munisipiu Lautem, hetan partisipasaun husi ministru Petróleu Rekursu Minerais, Komandante Komponente Naval, Prezidente Autoridade Munisipál, Diretores Servisu Munisipais inklui komunidade Lautém.
Reportagen:Veru.
Editor : B. Angel.
