Lospalos : Hafoin verifika atividade fiziku iha kampu, Ministeiru Agrikultura no Pescas(MAP) liu husi diresaun nasional agrikultura, hortikultura e protesaun das plantas, departamentu hortikultura, konsidera Grupu hortikultura Arava sawarika Priense kriteria no merese hetan apoiu husi Ministeiru hodi hasae produsaun hortikultura ne’ebe forte iha munisipiu Lautém.
Wainhira sekebra acordu ho grupu hortikultura Arava Sawarika, Reprezentante ekipa Verifikasaun João Eligio afirma objetivu vigita equipa MAP nian mak atu verifika no hare direitamente atividade husi grupu hortikultura Arava Sawarika nian iha kampu tuir proposta ne’ebe mak submete ona ba Ministeiru agrikultura liu husi diresaun geral agrikultura iha tinan 2022 liu ba.
“Ami mai hodi verifika atu hatene lolos grupu ida ne’e lao ka lae, no nia atividade fiziku iha terrenu ne’e iha ka lae, ne’ebe grupu juventude ida ne’e ita hare katak presiza duni para ita atu bele suporta duni bazea ba atividade iha terrenu.” Informa João Eligio ba Media Lautém Post.
Nia hateten hafoin halo verifikasaun, intervensaun husi ministeiru nian mak sei tau matan no fo apoiu fundus atu nune’e bele iha duni atividade hortikultura ida ne’ebe forte iha Munisipiu Lautém.
“Intervensaun ne’ebe ministeiru sei fo maka sei tau matan no fó apoiu fundus, ita fiar apoiu ne’e sei la lakon let deit, tanba benefisia duni povu, atu nune’e sira bele lao tuir. Tanba ne’e ita sei halo monitorin nafatin para grupu ne’e bele ba oin, para nune’e iha duni hortikultura ida ne’ebe maka forte.” Tenik nia.
Tuir nia, tipu husi apoiu ne’ebe ministeiru sei fó mak apoiu fundu ho montante $ 2000,00 ba kada grupu hortikultura sira ne’ebe mak destinadu tuir mata dalan ne’ebe ministeiru iha.
“Ida ne’e kada tinan tinan, laos apoiu material maibe liu husi orsamentu ida ne’ebe maka ministeiru iha kibit atu fó apoiu ba grupu ida ne’ebe maka destinadu, no grupu ida ne’e dehan katak bele. Montante ne’e tuir matadalan ne’ebe mak tekniku sira prepara ne’e, katak kada grupu ida iha $ 2000,00 .” Nia subliña
“Kuandu mai ona hare iha terrenu hanesan ne’e, possibilidade grupu sira ne’ebe mak ita mai hare ona ne’e ita bele apoiu ona maibe tuir ninia prossesu, prossesu ida maka mai hare no seluk tuir ministeiru nia lalaok tanba ne’e tuir sistema, karaik atu apoiu bainhira los ne’e hau labele hatene, maibe orsida lori fali ba mak supoerior sira mak deside.” Nia argumenta.
Iha sorin seluk Ko’ordenador Grupu Hortikultura Arava Savarika Aldios da Costa Martins haktuir, proposta refere nia parte prepra no submete ba MAP iha tinan 2022 liu ba, no iha tinan 2023 halo ona verifikasaun dala ida maibe ba prossesu sira etapa tuir mai laiha ona informasaun to’o iha 2024 mak ekipa verifikasaun vizita fila fali to’os Grupu Arava savarika.
Nia komfesa, iha vizita ne’e ekipa MAP halo asesmentu ba atividade fizika sira iha terrenu ne’e lao ka lae, depois grupu ne’e oinsa. Alen de ne’e ekipa MAP mos lori karta akurdu hodi assina hamutuk atu bele apoiu grupu hortikultura Arava Sawarika hodi bele hasae produsaun iha munisipiu Lautém.
“Hau iha esperansa bo’ot tanba baze legal ida maka ohin ita assina ona Akordu atu sira suporta, atu ita bele hasae fali ita nia produsaun.” Nia garante.
Aldios subliña hafoin aprende hortikultura besik tinan rua iha Israel nia iha Vizaun bo’ot atu hasae produsaun agrikultura iha munisipiu Lautém tanba ne’e nia agradese ho apoiu ne’ebe mak sei ofere husi MAP liu husi diresaun nasional agrikultura, hortikulrua e protesaun das plantas, departamentu hortikultura ba grupu hortikultura Arava Sawarika.
“Hau nia vizaun bo’ot maka atu hasae produsaun iha Munisipiu Lautém, hau espera mesmu ho atividade ne’ebe ki’ik maibe hamutuk ho ita nia parseiru no grupu sira ita bele hasae ita nia produsaun iha munisipiu, segundu maka kria grupu ida ne’e para sira atu bele aprende funsaun lolos husi to’os nain ne’e saida.” Dehan Aldios.
“Agrikultura ninina importansia ba iha ita nia nasaun liu liu munisipiu Lautém ne’e saida. Atu nune’e ita bele manten nafatin ita nia pozisaun ida ne’e hodi hasae ita nia produsaun no kresimentu ekonomiku hanesan nasaun ida ne’ebe maka nia populasaun maioria haknar an hanesan agrikultor.” Nia akresenta.
Entretantu iha tinan ne’e Ministeiru Agrikultura liu husi diresaun nasional agrikultura, hortikulrua e protesaun das plantas, Departamentu hortikultura sei apoiu grupu hortikultura rua iha munisipiu Lautém liu husi fundu transferensia públika ho montante $ 2000,00 ba kada grupu tuir mata dalan Ministeiru nian.
Reportagen: Ekipa Media Lautém-Post
Editor: Joenaca Tupa da Conceição.
