Lore: Komunidade Postu administrative Lore munisipiu Lautém kontinua halerik ba Kondisaun etrada ne’ebe mak nakfilak hanesan mota wainhira hasoru tempu udan.
Xefe suko Lore 2 Eurico Da Costa hateten, Kondisaun estrada postu Lore dadaun ne’e sai preokupasaun ba komunidade postu Lore tamba difikulta atu asesu ba merkadu hodi faan sira nia produtu.
Nune’e autoridade lokal ne’e husu ba governu atu hadia lalais Estrada ligasaun Lore ka Kapital Munisipiu tanba komunidade postu Lore balun sai vitima ona ba estrada refere.
“Preokupasaun bot liu ne’ebé komunidade sira infrenta mak atu asesu ba merkadu araska liu, tamba kondisaun estrada grave tebes. Tan ne’e husu ba governu atu tau kbit no responsabilidade hodi hanoin netik ba ami nia Estrada ne’e” katak Xefe Suku Lore 2 Eurico Da Costa.
Nia informa, durante ne’e komunidade sira husi Postu Lore susar tebes atu asesu ba merkadu tamba kondisaun estrada ne’ebé grave, difikulta tebes no fo ameasadu ba komunidade nia vida wainhira halo viagen ba capital Munisipiu.
“tamba durante komunidade balun sai ona vitima ba estrada ne’e.” Tenik sefe suku lore 2 ne’e.
Iha sorin seluk komunidade suku Lore 2 Francelino Dos Santos Nolasco hateten tinan barak ona estrada postu Lore kontinua a’at ba beibeik no difkukta tebes Lore oan sira atu asesu ba merkadu.
“Estrada postu lore grave tebes iha tinan barak nia laran, difikulta tebes ami Lore oan liu-liu inan aman sira ne’ebé hakarak lori sira nia produtu lokal hodi asesu merkado”. Katak komunidade ne’e
Nia afirma komunidade suku Lore hamutuk ho autoridade lokal sira inklui intelektual suku sira, sempe halo proposta ba Guvernu maibe to’o ohin loron seidauk iha resposta ida hodi hadia Estrada diresaun Lospalos vila ba Postu Lore ne’e.
“ami sempre hamutuk ho konseilhu suku no intelektual sira hodi halo proposta ba governu, no liu husi konferesia pers mos ami halo. maibe to’o agora seidauk iha resposta.” Hatutan komunidade suku Lore ne’e
Hatan ba preokupasaun ne’e, Administrador postu administrativu Lore Carolino Da Silva Rekoñese katak durante ne’e komunidade preokupa tebes ba kondisaun estrada Lore. tamba ne’e nia hateten iha tinan kotuk nia parte halo ona pedido ba Institutu Gestaun Ekipamentos (IGE) no tempu badak nia laran nia sei ba konfirma pedidu ne’ebe mak hatama ona ne’e.
“Preokupasaun bo’ot ba komunidade mak estrada tamba bele lori risku ba komunidade sira. Tan ne’e nu’udar administrador postu dala barak halo pedido ba IGE atu halo rehabilitasaun hodi normaliza ita nia estrada ne’e,” informa Autoridade postu Lore ne’e.
“Iha tempu badak hau sei desloka ba Dili atu ba follow up ba pedidu ne’ebé mak hau submete ona iha fulan Novembru tinan 2023 iha IGE Nasional, atu nune’e sempre iha liña kordesaun ho IGE municipal. Nune’e iha fulan Marsu nia laran bele desloka mai iha postu Lore hodi normaliza ka ateru kondisaun estrada ne’ebe mak a’at liu ne’e.” Nia hatutan tan.
Entretanto Postu Lore kompostu husi suku rua, mak hanesan suku Lore1 no suku Lore2 no produtu Lokal sira ne’ebé mak postu Lore iha mak hanesan produtu Nu’u, Kamí, Ai-kameli, batar no produtu lokal sira seluk, ne’ebé mak labele asesu ba merkadu tamba kondisaun estrada a’at hodi prezudika movimentasaun publiku husi Posu Lopalos vila ba Lore.
Repostagen: Hala Veru.
Editor: Joenaca Tupa da Conceição.
