Lospalos: Komandante Jerál Polísia Nasionál Timor Leste (PNTL) vizita komandu munisipiu Lautém apresia membru PNTL Lautém nia servisu tanba kumpre orden komandu.
Komandante Jerál PNTL, komisáriu jerál polísia, Henrique da Costa, hala’o vizita da-uluk iha komandu munisipiu Lautém ho nia estrutura hodi hato’o orientasaun komandu nian ba membru efetivu iha Lautém.
Komisáriu dehan, komandu nia vizita ba munisipiu Lautém ne’e atu orirenta efetivu sira hodi servisu tuir lei no orden tanba, prezidente da repúblika no primeiru-ministru orienta ona liu husi enkontru superior defeza nian iha palásiu prezidensiál.
“Apresia membru sira nia servisu no dedikasaun durante 2023 nian. Iha enkontru superior, prezidente repúblika (hanesan komandante supremu forsa armada) husu membru sira mantén disiplina hodi serbí ita nia komunidade”.
Komisáriu argumenta, PNTL tenke hakbesik ba komunidade sira hodi prevene krime no esplika lei, nune’e evita krime tanba daudaun ne’e, sidadaun balun sai vítima ba tráfiku umanu.
“Krime organizadu tráfiku umanu joven barak sai vítima, balun ema bosok ba serbisu iha rai-li’ur maibé laiha serbisu tanba ne’e, husu ba komandu espesialmente seksaun operasaun, orienta polisiamentu komunitária tránzitu no investigasaun, sensibiliza lei sira iha eskola no komunidade sira”, nia orienta.
Komandu Munisipiu Lautém Nia Proposta ba komisáriu
Durante vizita, komisáriu simu rekomendasaun husi komandu munisipál kona-ba problema infrastrutura bázika no menus rekursu umanus.
hafoin simu komandu munisipál nia preokupasaun, komisáriu dehan, sei aprezenta ba ministru interior hodi halo konstrusaun.
“Eskuadra balun nia kondisaun fízika aat daudauk ona mezmu foin konstrui iha tinan 2010 no 2012. Relatóriu sira ne’e ita kontinua relata ba ministeriu interior hodi orienta tékniku mai survey fatin antes halo konstrusaun”, nia esplika.
Kona-ba membru rekursu umanu, komisáriu dehan, la’ós de’it iha Lautém maibé munisipiu hotu hasoru problema hanesan tanba iha hahu husi tinan 2008-2023, PNTL la rekruta efetivu foun.
“Husi tinan 2008-2023 PNTL la halo rekrutamentu, ta nia ema (membru) menus ba beibeik, balun mate, rezigna an, demisaun, abandona serbisu, entaun halo serbisu menus ba beibeik”, dehan komisáriu.
Atu rezolve menus efetivu, komisáriu afirma, komandu submete proposta rekrutamentu ba governu ho ikus mai aprova hodi halo rekrutamentu a efetivu PNTL 200 iha tinan ne’e.
“Ekipa traballu prepara hela kuríkulu atu finaliza ona no estabelese regras ba rekrutamentu sira. depois de remata sei aprezenta ba ministériu interior hodi hetan aprovasaun hodi implementa”.
Komandante PNTL munisipiu Lautém, superintendente polísia, Joao da Costa, hatete, aprezenta komandu nia preokupasaun ba komisáriu no hein rezultadu.
“Tinan barak preokupasaun barak eziste iha munisipiu Late, ohin ami aprezenta ona ba komandante jerál ho nia ekipa atu nune’e sira bele akompaña buat ne’ebé bele halo, bele apoiu”, komandu dehan.
Reportage : Hala Veru.
Editor : B.A
