Lospalos- Asosiasaun Feto munisípiu Lautém husu maluk feto sira brani kompete ho mane sira eleisaun xefe suku, ne’ebé realiza iha 28 Outubru 2023, tanba feto sai líder hahú husi sosiedade no jestor iha familia laran.
Prezidente Asosiasaun feto Lautém, Maria Lizia De Fatima informa, objektivu husi formasaun atu fo konesimentu enkuadramentu legal ba prosesu eleisaun suku no aldeia nian ba maluk feto sira.
“Liu husi formasaun feto potensial husi nivel aldeia no suku, bele hetan informasaun no konesimentu ba enkuadramentu legal, ba prosesu eleisaun suku nune senti hetan koragem hodi bele partisipa prosesu eleisaun suku no aldeia.” dehan nia, 05/10/2023.
Maria Lizia dehan, Feto la’ós foin mak líder, maibé líder nanis hahú husi husi familia, sai lider no jestor di’ak iha familia presija mós fahe matenek ba ema seluk.
“Feto laos foin lei fo garantia atu sai lider ne’e laiha, feto sai líder nanis hahú husi sosiedade kiik iha familia, harii familia sai ona líder, sai jestor di’ak iha família, sai lideransa di’ak iha família, matenek ne’ebé iha, presija fahe ba ema seluk, lalika tauk tenki brani hamrik prosesu demokrásia mak define,” nia relata.
Nia haktuir, feto la bele tauk tanba iha enkudramentu legal hodi garante kadidatu feto atu sai lider iha kualker pozisaun iha nasaun demokrasia ida-ne’e.
“Feto la presija tauk, tanba iha lei ne’ebé regula ita, iha ona enkudramentu legal ne’ebé garatia ba kandidatu feto sira iha kualker pozisaun liu-liu atu hasoru eleisaun lider komunitariu,” nia informa.
Iha fatin hanesan, Sekrátariu Munisípiu Lautém, Jacinto da Costa, agradese ba feto sira tanba brani ona atu kandidata aan no husu atu pasensia ho matenek no domin hodi dezenvolve povu ho di’ak.
“Agradese ba feto sira komesa brani kandidata aan ba partisipa eleisaun, sira mos bele serbisu sira nia aldeia no suku ho pasensia ho matenek no domin bele dezenvolve sira nia suku sai diak,” dehan nia.
Entretantu provizoriamente feto potesial lautem kada postu iha kandidatu partisipa eleisaun suku, hanesan postu Lautém na’in 7, Xefe suku 4 no aldeia na’in 3. postu iliomar, Xefe suku na’in 1, sefe aldeia na’in 3, postu lospalos cefe aldeia na’in 7, Xefe suku na’in 1, postu tutuala na’in 1, Xefe aldeia seidauk, postu Luro no postu lore seidauk iha.
Reportagen: Veru Fernandes.
