Lospalos: Sekretáriu Munisípiu Lautém konsidera atu sai lideransa ne’ebé mak di’ak feto ho mane tenke kompleta malu, tanba ne’e eleisaun xefe suku bainhira feto sira kompete no manán eleisaun, presija mós apoiu husi mane sira hodi implementa sira nia vizaun no misaun durante nia mandatu.
Sekretáriu Munisípiu Lautém, Jacinto da Costa hatete, atu sai lider komunitariu ne’ebé mak di’ak tenke hadomi ema hotu, hakuak ema hotu.
“Sai lider ema dehan halo ema seluk hanesan espelu ne’ebé hamnasa karik nia mós hamnsa, tanis karik nia mos tanis, kontenti nia mos kontenti, sai lideransa iha fatin ida, fo hamnasa ba ema hotu, hamnasa no kontente ho kolega sira seluk ne’ebé mak hili ita boot,” dehan nia liu husi diskursu,05/10/2023.
Nia haktuir, feto prontu lidera mane tenki apoiubno hetan tulun husi inan-aman, lian-nain sira hodi hetan matak malirin, hein katak eleisaun lideransa suku tinan ne’e feto Xefe suku iha.
“Feto prontu lidera, ami mane tenki apoiu imi,tenki hetan tulun apoiu husi aman sira tiu sira, lia nain sira hodi hetan matak malirin hetan korage, no hein katak iha tinan nee feto ida sai sefe suku,” Nia informa.
Nia enkoraja liutan feto potensial sira atu lalika tauk, maibe brani hodi hatan kualker situasaun no labele tauk lakon, tanba demokrasia manán ka lakon ne’e normál.
“Korajen ba feto sira lalika tauk tenki brani hatan kualker situasaun iha ita nia oin nune atingi mehi nebe ita hakarak, labele tauk ho lakon nee, maibe hanoin ba katak iha esperansa atu avansa,” Nia fundamenta.
Reportage :Veru Fernandes.
