Lospalos – Instituisaun Nasional Linguistika Timor-Leste ( INL.T-L) Kapasita professor no funsionariu administrasaun sira kona ba oinsa atu utilija lian Tetun ho lolos iha area serbisu administrasaun nian iha Municipiu Lautem.
Diretora ba INL Rosa Da Costa Tilman informa, objektivu husi formasaun ne’e atu haklean koñesimentu professor sira nian hodi bele introdus elementu linguistika ba estudante sira, inklui Funcionariu administrasaun sira wainhira hakerek karta sira iha lian tetun.
“Objektivu fo formasaun atu hanorin oinsa hakerek tetun lolos. La kestiona ba koalia, maibe liuliu oinsa hakerek. ba maluk Administrasaun sira oinsa hakerek karta ho lolos, nune’e mos professor sira oinsa mak hanorin estudante sira konaba elementu linguistika ne’e ho lolos.” Dehan nia ba Lautem Post, Tersa (15/08).
Diretora ne’e haklaken Origen husi tetun prasa ne’e mai husi tetun terik ne’ebe mak kahur ho lian Português, nune’e lia fuan Tetun barak mak hariku ho vokabulariu imprestimu sira husi Português.
” Tetun prasa ida dezenvolve ne’e mai husi ninia fontes ka be matan rua, tetun prasa hariku ninia vokabulariu husi emprestimu lian portugues no foti husi tetun terik. Entaun tetun baibain ita koalia ne’e origen mai husi tetun terik, entaun forma balun ita foti husi tetun terik liafuan balun ita foti husi portugues.” Nia esplika.
Entretantu Formasaun linguistika ne’e hanesan formasaun nivel avansadu ba formandu sira ne’ebe mak tuir ona formasaun nivel baziku, kona ba oinsa atu uja gramatika hodi forma fraze sira ho diak, liu-liu konaba oinsa atu hakerek textu ka karta ida ne’ebe diak.
“Simplesmente ami mai so fo deit maneira no estrategia metodologia oinsa hanorin estudante mais ami la fokus ba kurrikulum tamba nee responsabilidade ministeriu edukasaun nian”. Tenik nia
Iha sorin seluk formandu Angelo Lopes, Manorin nain husi EBC (Ensinu Basico Central, sigla Português) Laiku hateten, nia sente orgulu tamba bele tuir formasaun ne’e hodi haklean liu tan nia koñesimentu iha lian tetun.
“Hau pessoal hanoin diak, tamba tetun ne’ebe agora uza hela iha ita nia rai ne’e iha versaun rua, ida tetun husi Institutu Nasional Lisguistika husi UNTL no ida husi DIT. Ami presija ida ne’e tamba ida ne’e maka padraun ida ne’ebe husi Parlamentu aprova, tamba ne’e mak ami presija tuir formasaun modelu hanesan nee.” Dehan nia ba Lautem Post, Tersa (15/08).
Reportagen : Demigildo Veru Fernandes
Editor : Joenaca Tupa da Conceição
