LOSPALOS: Prezidente Autoridade Munisípiu (PAM) Lautém, Mélio de Jesus, afirma empreza manán na’in sira ne’ebé implementa projetu Estadu la tuir termu kontratu no la ho kualidade, mak sei hetan penalidade husi autoridade hodi prosesu tuir lei.
“Empreza sira ne’ebé implementa projetu PDIM ne’e mak la tuir termu kontratu liuliu la ho kualidade maki ta sei foti asaun penal hasaoru no bele hasai husi lista kompañia iha munisipál,” dehan PAM Lautem ne’e hafoin observa projetu PDIM ne’ebé implementa ona iha loron 1 Julli, Lospalos, ohin.
Lee mós: PAM-SEDL lansa fatuk dahuluk ba projetu PDIM 15 iha Lautem
Projetu PDIM hamutuk 16 hanesan projetu 14 sei la apropria tanba laiha orsamentu atu re-apropria ba tinan oin, enkuantu projetu 2 hanesan konstrusaun uma-adat Lautem, no uma antigu karpintéria Chai-Waca sei re-apropria tanba foin maka hahú servisu iha fulan Agustu tinan ne’e.
“Objetivu vizita ba projetu ne’ebé halo iha munisípiu Lautem atu liuhusi programa kapitál dezenvolvimentu nian atu hare diretamente progresu serbisu ne’ebé la’o ona, no mós atu hare kualidade obra sira ne’e. Tuir duni dezeñu no Bill of Quantity (BoQ) tanba dala barak iha tereñu kuando ita hare rezultadu finál dala ruma la tuir,” nia afiirma.
Daudaun projetu PDIM hamutuk 16 no projetu UNDP mak tolu nian ne’ebé kategoria prosesu liuhusi mekanizmu aprovizionamentu lei rejime júridiku aprovizionamentu.
Nune’e, nia husu ba kompaña sira ne’ebé implementa projetu tuir kontratu ne’ebé sira asina ho durasaun tempu ne’ebe determina ona iha loron 31 dezembru tinan ne’e.
Entretantu tinan ne’e projetu PDIM ne’e kompostu husi konstrusaun ba saladeaula eskola iha Lautem, kanalija be’e moos, ponte, armajen STAE, Parajen karreta iha administrasaun munisipál Lautem, mortuariu, kampu multifunsaun, konstrusaun uma-adat Lospalos no konstrusaun ba uma antigu karpintária ho totál orsamentu kuaje millaun $1,8.
Lee mós: PAM Lautém husu kompañia vensedór implementa projetu PDIM
Reportajen: Veru
Editór: Helefatil
