Lautem Post- Suku Muaapitine nudár suku ne’ebé lokaliza besik lagoa Ira-lalaru, iha parte Leste kapitál munisípiu Lautém nian, ho nia totál uma kain 557 (atus lima, lima-nulu-resin-hitu), totál populasaun, 2. 878 (rihun-rua, atus –ualu, hitu-nulu resin-ualu).
Xefe suku Muapitine, Livio Mendes, hateten, tempu udan akontese inundasaun (Bee sa’e) estraga komunidade nia plantasaun no animal hakiak, tanba ne’e, autoridade ezije governu harii moru protesaun, nune’e, populasaun iha aldeia 5 sente seguru.
“Governu tenke harii moru protesaun tanba tempu udan boot, bee sa’e, afeta populasaun iha aldeia Pehefitu, Lupuloho, Muaapitine no Vailoru. Iha Aldeia Malahara besik liu Lagoa Ira-lalaru, entaun animal hakiak barak mak mate. Lafaek han hotu” dehan nia, (16/08/)
Autoridade ne’e dehan, iha tempu udan, atividade agríkola paradu tanba to’os na’in labele sai husi nia hela fatin.
“Bainhira tempu udan Bee sa’e, atividade ba toos ne’e para ona. Hare animal ne mós para ona. Bee maran mak kontinua atividade” tenik nia.
Reportajen : Veru Fernandes
Editor : Ratu-Lata
