Lautem – Ministeiru Agricultura Pescas, Pecuaria e Floresta (MAPPF) sei konstrui irigasaun iha mota Ira Bere Postu Administrativu Iliomar, munisipiu Lautem hodi hasae produsaun Fos iha Rai laran.
Ministru Agricultura Pescas, Pecuaria e Floresta Marcos Da Cruz hateten irigasaun mota Ira bere nee iha ona planu no dezeñu, tanba nee hein deit iha tinan oin sei aprezenta ba proposta Orsametu Geral do Estado OGE 2024.
Guvernante nee haklaken, tuir planu irigasaun mota Ira bere nee sei kanaliza ba Postu Iliomar, municipiu Lautem no postu Vatucarbau municipiu Viqeqe hodi fornese be ba natar nain sira nebe mak lokaliza entre Baliza Munisipiu rua nee.
“Ira Bere aban bain rua halo karik, nee mos halo odamatan rua hanesan mos iha laivai nian, odamatan ida kanaliza ba area Vatucarbau, ida ba area postu Iliomar. nebe iha dezenu tau atensaun hela mais tenki halo ho fazeadamente.” katak nia ba Lautem-Post, 14/10/2023.
Entretantu MAPPF aprezenta ona planu no dezeñu rua ba komisaun Fundu Infra Estrutura nian mak hanesan irigasaun ba mota Vatuva iha Maliana no Irigasaun ba mota Ira Bere iha postu iliomar nudar Prioridade Guvernu dasia nian iha tinan 2024.
“apresenta iha komisaun fundo infrastrutura projetu 3, maibe projetu iha Ministerio Agricultur nia responsabilidade rua mak sei lao hela. depois iha costa sul uluk halo konstrusaun maibe rai barak sei abandona nee mak aprova ida, liu-liu iha maliana. progetu rua ba irabere ho vatuva nee tinan oin mak aprezenta fali mais ita tau mos atensaun ba Ira bere.” Nia esplika
Governante nee afirma wainhira guvernu investe ona osan ba progetu bot sira, nune nia husu atu agricultor sira nebe iha ona bee no asesu ba irigasaun atu serbisu nudar agricultor, ho nune bele hasae produsaun Fos iha rai laran.
“Apelu mos ba agricultor hotu iha natar, iha ona irigasaun, iha ona bee. tenki serbisu, estado tau osan halo projetu bot hanesan nee mais povu mos tenki tama ba natar, se la ba oinsa mak produsaun nee sae, tambe nee hakarak apelu ba agricultura iha Timor laran tomak atu serbisu iha natar” tenik nia
Antes nee Ministerio Agricultura Pecuaria, Pescas e Floresta halo ona konstrusaun irigasaun iha suku ililai postu Administrativu Lautem, neebe mak dadaun nee halo hela estudo no konsultan ba kanais hamutuk 27 nebe mak sei remata iha tinan oin inklui estudo ba mota iha Laivai.
Reportagen: Veru Fernandez
Editor: Joenaca Tupa da Conceição
