Lospalos: Komunidade munisipiu Lautem lamenta, atendimentu husi Diresaun Serbisu Registu Notariadu (DSRN) munisipiu Lautem tamba aplika fali sistema ho versaun foun hodi limita numeru kliente sira ne’ebé mak trata dokumentu Bilete Identidade (B.I) no Pasaporte.
Kliente Aleixo Da Costa hatete, lamenta ho atendimentu servisu munisipal koncervatoriu registu notariadu munisipiu Lautem tamba aplika fali sistema foun liu-liu ba trata B.I no Passaporte nian, inklui simu deit kliente sira ho limitadu.
“B.I ne’ebé mak update fila-fali, hau nia B.I ne’e to’o iha 2029 mak mate maibe tenki renova, serake ida ne’e la validu ka oinsa mak tenki mai renova.” Katak Aleixo Da Costa ba Jornalista Lautem-Post.
Komunidade ne’e mos lamenta tanba servisu munisipal koncervatoriu registu notariadu munisipiu Lautem simu deit kliente ne’ebé trata dokumentu passaporte ho númeru limitadu maximu nain 20 deit kada loron.
“Ba pasaporte mos loron ida atende 20 pessoas deit, serake loron ida laos ema ida rua deit mak mai, maibe barak mak mai. Tamba saida mak atende 20 pesoas deit.” Nia afirma tan.
Hatan ba lamemtasaun ne’e diretor interinu servisu munisipal konservatoriu registu notariadu Lautem Sabino Dias Quintas konfirma, nia parte seidauk bele domina sistema versaun foun refere.
Tamba ne’e nia dehan, kada loron ida sira sei atende deit klienstes ho numeru limitadu.
Nia hatutan, relasiona ho sistema versaun foun ne’e nia parte mos relata ona ba diresaun geral atu fó formasaun ba funsionariu sira kona-ba operasaun sistema refere nune’e sira bele hatene hodi fó atendimentu ho lalais ba klientes sira.
“Mudansa de sistema, tamba sistema versaun tuan ne’e aplika ba fali sistema versaun foun entaun sistema ida tomak ami la halo operasaun ba sistema foun ne’e, ami mos seidauk familiar ho sistema ne’e. Tamba foun entaun ami labele atende klientes to’o 100, maibe to’o deit 20 to’o 30.” Nia argumenta.
“Ami mos relata ona ba diretur jeral atu fó formasaun ba sistema foun ne’e, nune’e ita bele atende lalais ita nia inan aman sira.” Nia haktuir tan.
Iha fatin hanesan komisariu asuntu disiplinar husi Komisaun Funsaun Públika Agapito Da Conceição haklaken, nia parte mos sei relata problema sira ne’ebé mak servisu munisipial sira hasoru iha munisipiu Lautem ba iha konseillu ministru no ministeriu relvantes sira atu bele responde.
“Ami sei halo hotu relatoriu kona-ba preokupasaun sira ne’e no ami nia ekipa sei aprezenta ba konseillu ministru no ba ministeriu tutela sira, para fasilidade no rekursu ne’ebé menus nune’e sira bele halo kompleta.” dehan komisáriu ne’e ba Jornalista Lautem-Post hafoin halao vizita ba Munisipiu Lautem.
Entretantu tuir observasaun ne’ebe jornalista Lautem-Post nota iha terenu, katak kada loron kliente ho kuantidade barak kontinua nakonu iha edifisiu servisu munisipal koncervatoriu registu natariadu Lautem, hafoin serbisu rejistu notariadu Lautem aplika sistema foun hodi limita atendimentu ba klientes sira ne’ebé trata B.I no Pasaporte.
Jornalista: Veru.
Editor: Joenaca Tupa Da Conceição.
