LOSPALOS- Ensino Báziku Central Iliomar no Odofuru, Postu Admiistrativu Iliomár, Munisípiu Lautém, laiha profesór lian inglés nian no tranferénsia orsamentu konsensaun eskolár tarde, nune’e eskola deve matéria iha loja sira hodi atende nesesidade eskolár nian.
Diretór EBC Iliomar, Marcos Dos Santos, informa durante ne’e profesór ba matéria lian Inglés laiha atu hanorin alunu sira, nune’e difikulta estudante setimu ano to’o nono ano laiha valór hahú husi ezame períodu dahuluk no daruak.
“Iha ezame primeiru períodu no segundu tinan ne’e matéria seluk ami prense tuir orientasaun Ministériu edukasaun, maibé ba matéria lian Inglés ami halo hamamuk tanba laiha profesór atu hanorin matéria ne’e. Tanba la’ós ami mak regula, maibé Ministériu Edukasaun mak regula”, Diretór ne’e hatete ba Lautem Post iha kna’ar fatin, ohin.
Nia afirma, molok ne’e porfesór Inglés iha, maibé nia kontratu hotu iha dezembru 2023, nune’e nia la kontinua hanorin iha eskola ne’e.
“Profesór inglés laiha duni husi primeiru ate segundu períodu iha 2023, maske iha nu’udar profesór parsiál ne’ebé ami mak kontratu rasik atu hanorin, maibé Ministériu hapara iha 1 janeiru ate 31 de dezembru 2023. Iha janeiru 2024 to’o agora profesór komesa laiha.”
Maske, Líder eskola ne’e husu ona ME atu koloka profesór balun ba eskola ne’e, maibé seidauk responde ate agora, nune’e afeta ba nonu ano, bainhira atu halo ezame nasionál.
Totál Profesór iha EBC no filiál iha Iliomar hamutuk 32, kompostu husi permanente 26, ingresu espesiál na’in 6.
Profesór deve HVS no tinta iha loja
Entertantu, Ministériu Edukasaun distribui tarde orsamentu konsesaun eskolár, rezulta profesór sira tenke deve materiál husi loja hodi responde ba nesesidade alunu sira nia.
Diretór EBC Odofuru, Tomas Da Costa.Imajen/Veru
“Orsamentu konsensaun eskolár ne’ebé transfere tarde husi Ministériu Edukasaun, profesór sira tenkr deve materiál iha loja hodi bele responde nesesidade alunus sira nian tanba alunu sira tenke halo ezame tuir kalendáriu ne’ebé iha,” Diretór EBC Odofuru, Tomas Da Costa, afirma iha kna’ar fatin.
Sasán ka materiál ne’ebé eskola ne’e deve iha ezeme primeiru trimestrál mak hanesan HVS no Tinta iha loja, hodi hein osan sai mak bá selu.
“Iha 2024 osan ba konsensaun eskolár trasfere kada trimestrál de’it entaun janeiru to’o juñu, maibé atividade la’o kada trimestre depende dos alunus tanba orsamentu iha tinan 2 ba kotuk ne’e um aluno ho orsamentu $1 ka dolar ida. Maibé iha tinan rua ba kotuk ne’e kada alunu ida iha $2 ka dolar rua vezes ba totál alunu, ne’ebé agora dadaun ami tuir hela ba manuál foun ba 2024 nian hakarak ka lakohi osan ne’ebé iha depende ba totál alunu sira”, nia afirma.
Nune’e, nia husu Ministériu Edukasaun atu transfere konsesasaun eskolár, kada trimestrál atu bele jere ho di’ak.
Relasiona ho preokupasaun ne’e, Jornalista Lautem post tenta atu konfirma asuntu ne’e ba Diretór Edukasaun Munisipál Lautem, maibé la disponivél tanba okupadu ho asuntu serbisu iha Dili.
Reportagen: Veru
Editór : Helefatil
