LOSPALOS: Daudaun ne’e, jerasaun foun barak seidauk hatene istória luta ba ukun-rasik-aan nian, nune’e presija tau Iha Kurríkulu hodi hanorin ba estudante sira atu hatene.
Veterenu Munisipiu Lautem, Kasian Susar husu ba Governu atu tau istória Luta nian Iha Kurríkulun eskolár hodi hanorin ba estudante sira.
“Istória funu ba libertasaun patria nian foin-sa’e sira seidauk hatene loloos hahú husi 1975 to’o 1999 iha konsulta populár, tanba ne’e Ministériu Edukasaun presiza tau iha Kurríkulu atu mestri sira hanorin ida ne ba estudante sira para juventude feto-mane hatene istória ida nee,” hateten Veteranu ne’e ba Jornalista Lautem Post iha Lospalos Vila, domingu ne’e.
Iha fatin hanesan, Estudante husi Eskola Sekundária Nino Konis Santana, Letiçia Elviana mós husu ba Ministériu Edukasaun atu tau istória luta nian ba Kurríkulu, nune’e sira ho nia jerasaun bele hatene.
“Nu’udar estudante hakarak hatene istória ne’ebé luta nain sira halo tau iha Kurríkulu ida atu ami bele aprende hodi hatene, nune’e istória sira ne’e labele lakon, tanba jerasaun ba jerasaun bele konta no banati tuir.”nia afirma.
Entretantu, Prezidente Asosiasaun Feto iha Munisípiu Lautem (AFEL),Maria Ligia Fatima mós rekomenda ba Governu atu kontinua lori luta na’in sira hodi konta prosesu luta ba jerasaun foun sira atu hatene loloos istória ukuan-aan ida ne’e
“Ohin oradór sira mós fó sira nia sasin konta sira nia istória iha tempu ne’ebá ida-ne’e bele motiva ba jerasaun foun sira, tanba sira seidauk hatene istória ho loloos, maibé se tinan tinan ita kontinua halo reflesaun ho ema sira ne’ebé uluk partisipa rasik ka sai autór ba prosesu mak bele konta nia istória ba bebeik no bele halo jerasaun foun sira hatene istória loloos no fó valor ba loron ida-ne’e”, nia afirma.
PAM husu Lautem-oan halo reflesaun
Prezidente Autoridade munisipál Lautém, Mélio de Jesus informa katak selebrasaun konsulta populár iha Lautem ne’e konvida mós estudante sira atu akompaña reflesaun ne’e hodi rona istória husi sasin sira nian nune’e, sira bele hatene no komprende prosesu luta nian hodi tau aas espiritu nasionalizmu no patriotizmu.
“Estudante no joven sira partisipa iha reflesaun ida-ne’e sira bele rona istória sasin nain sira atu sai nu’udar bukae ida ba prosesu aprendizajen ida liu-liu istória timor nian,”nia afirma.
Líder masimu Lautem ne’e mós elata ona ba Ministériu Edukasaun no servisu munisipál edukasaun atu tau istória luta nian ba Kurríkulu hodi beke hanorin estudante sira hahú husi nivel primeiru sikulu to’o nivel sekundáriu.
“Ha’u koalia ona ho Diretor Edukasaun munisipál no koalia ona ho Ministra Edukasaun oinsa tau istória ne’e ba Kurríkulu eskolár nian hodi hanorin hahú husi pre-eskola to’o nivel sekundária no ba universidade tanba ne’e ita nafatin hato’o ba ministeriu edukasaun atu programa kurikukler istoria nian bele halo,” nia afirma.
Reportajen: Veru
Editór: Helefatil
