TUTUALA- Ministru Agrikultura, Pekuaria, Peska no Floresta, Marcos da cruz, promete rezolve problema ekipa guarda florestál ne’ebé uza osan rasik hodi sosa kombustivel bá enxe ró hodi lori bee ba rusa sira iha illeu Jaco, iha postu Tutuala, munisípiu Lautém.
Governante ne’e mós promete apoia ró no rekruta membru nain-4 hodi salva guarda ba área parke nasionál Nino Konis Santa.
“Ita mós sei lori ró peska mai iha ne’e, ohin ami haree ona katak presiza apoiu ró ba guarda floresta iha ne’e, no ami mós deside tau guarda floresta nain-4 iha ne’e ba tinan oin, nune’e ajuda jestór iha ne’e para sira bele kontrola tomak illa jaco tanba illa jaco nia luan kilometru kuadradu 11“, dehan Ministru ne’e ba Media Lautem post, 08/12/2023.
Governante ne’e profunda tan katak sei tau osarmentu kombustivel no manutensaun ba ró nune’e guarda florestál bele uza hodi halo kontrolu no uza hodi fó bee ba balada fuik sira.
Entretantu, Ministru ne’e afirma kontinua hadi’a nafatin hodi promove illa ne’e ba mundu, nune’e ema barak bele mai vizita.
Tanba ne’e, Governante apela ba ekipa guarda florestál sira atu serbisu ho badinas no serbisu ho hanoin ida nudar ema timor-oan hodi servi rai ida ne’e ho di’ak.
Reportagen: Nandez Veru
Editór : Helefatil
