Lospalos: Veternus 24 anos Kasian Susar sente triste, tinan 25 ona selebra loron konsulta popular maibe komunidade Munisipiu Lautém, sei kontinua halerik ba dezenvolvimentu ne’ebe sei lao ‘hakdasak’.
Eis Girilleiru FALINTIL tinan 24 ne’e husu atu guvernasaun IX (Dasia) ne’ebe Lideradu husi Primeiru Ministru Xanana Gusmão atu bele uza nia puder hodi lori dezenvolvimentu ba povu nia moris, liu liu hadia infraestrutura bazika sira ne’ebe mak to’o ohin loron seidauk hotu.
“Ami povu nia hakarak IX governu uza nia poder hodi halo dezenvolvimentu ne’ebe siedauk halo.” katak Kasian ba jornalista Media Lautém-Post, hafoin partisipa iha serimonia ba komemorasaun loron konsulta popular (30/08) foin lalais ne’e.
Veternu ne’e afirma, povu munisipiu Lautém tomak Ezize atu Governu kontinua dezenvolve povu nia moris, hodi hadia infrastutura bazika sira hanesan estrada, eletrisidade no be’e mos ba povu Lautém.
Tamba tuir nia, dadaun ne’e povu Munisipiu Lautém balun seidauk assesu ba estrada, be’e mos no eletrisidade liu liu Estrada ligasaun husi Lautém mai Lospalos vila.
“Ami povu tomak ezize atu dada be’e, eletrsidade, estrada ba povu tamba ita ukun aan ona maibe dezemvolvimentu ne’ebe estadu halo hanesan eletrsidade, no be’e mos, seidauk hotu. Balun halo no balun seidauk, estrada husi Lautém to’o mai lospalos to’o agora seidauk halo.” Tenik funu nain Eis Girilleiru FALINTIL ne’e.
Hatan ba preokupasaun ne’e Prezidente Autoridade Municipal(PAM) Lautém Melio de Jesus hateten nu’udar Governu lokal nia garante, katak iha nia mandatu sei halo dezenvolvimentu ba povu Lautém oan sira liu-liu hadia Estrada, eletrisidade no be’e mos.
“Ba dezenvolvimentu munisipiu Lautém, nu’udar governu lokal, nu’udar prezidente autoridade fiar ba IX governu ida ne’e sei implemeta sira nia programa durante iha periodu kampana eleitoral. Liu husi konfiansa povu nian no forma ona governu ida ne’e, hau fiar Lautém sei avansu ba nia progresu dezenvolvimentu.” nia garante.
Reportagen :veru
Editor: Joenaca Tupa da Conceição
