Lospalos: Responsavel programa TBC sentru saúde Lospalos, Benedito Cardoso, hateten, husi fulan Janeiru too Setembru, total pasiente ne’ebé sofre moras Tuberkuloze, hamutuk 113 no na’in ida maka lakon vida.
“Durante fulan sia, hahú husi Janeiru too Setembru 2023, bazeia ba dadus, pasiente hamutuk 113, kompostu husi mane 61 no feto 52. Nain ida seluk mate tanba moras komplikasaun”, katak nia, kuarta (25/10/).
Benedito afirma, ai-moruk atu halo tratamentu ba pasiente nia moras sei sufisiente tanba mnoras TBC depende liu ba ai-moruk.
“Ai-moruk ba tratamentu TBC sufisiente hela, tanba tratamentu TBC ne’e labele para iha loron ida, kuandu loron ida la hemu ai-moruk ne’e impaktu ba pasiente rasik”, nia esplika.
médiku nee husu ba pasiente tenke halo tuir reseita médiku, labele konsume hahán ne’ebé doutór bandu no disiplina hemu ai-moruk.
“Ba pasiente ne’ebé sofre moras TBC, favor ida, tenke pasiénsia no disiplina hemu ai-moruk durante fulan 6. Kuandu hemu ai-moruk la tuir nia loron, ai-moruk sei reziste ba imi nia isin. Entaun tenke halo tratamentu foun bele tuir fali tratamentu ne’ebé ho durasaun naruk too fulan 11 too 18”, médiku ne’e apela.
Entretantu pasiente husi Janeiru too fulan setembru barak mak hetan ona rekuperasaun.
Reportajen : Veru Fernandez.
Editor : Black Angel
